4695/2025-2026

Lunglei, 2026 Vau thla ni 4: Kum 1889 March ni 4-a Colonel Tregear-a'n "Fort Lungleh" a sak ṭan ni hriat reng nan leh Lunglei khawpuia cheng, ṭhang leh thar zelte'n Lunglei khawpui hmangaihna thinlung an put thar zel theih nana Lunglei puala ni bik ruahman, "Lunglei Ni" chu vawiin khan Lunglei Municipal Council (LMC) huaihawtin Lungleia C. Ṭhuamluaia Mualah a ṭum khat nan hlawhtling taka hman a ni.

LMC Chairman Pu Lalzuithanga chu Khuallian niin, Lunglei mipui zawng zawngte Lunglei Ni chibai a buk a. Lunglei Ni chu hlim ni, lawm ni a nih rualin, hlim leh lawm taka hmanga tawp mai tur erawh chuan a uiawm tih sawiin, Lunglei chu eng nge a nih a, Lunglei mipuite'n eng nge an tih theih sang ber tih hmu chhuak tura thawh rim bul ṭanna ni atan te, ṭhu thluanga sawrkarin min tihsak tur thlir ringawt lo va, mahni thawh chhuah hmang ngeia intodelh dan tur ngaihtuahna ni atan te hmang turin a chah a. Lunglei chu Municipal Council nei, khawpui lian a nih tawh avangin sawrkara innghat pumhlum ngawt lo va, mahni thawh rimna hmanga khawpui enkawl a, hmasawnpui tura mawhphurhna pek a nih thu sawiin, chu mawhphurhna chu hlen tumin LMC chuan theih tawp a chhuah tih a sawi a. C. Ṭhuamluaia Mual bul chu Multilevel Car Parking atan ruahman a nih thu leh tender chhuah ni a, a thawktu tur pawh tihfel a nih tawh thu sawiin, Theiriat ram TNT chhakah truck 70–80 vel din theihna tur Transport Hub cheng nuai 250 vel senga sak tur te, Sazaikawnah LMC Complex cheng nuai 400 vel senga sak tur te, Ramthar Market te pawh tender chhuak mai tawh tura beisei a nih thu a sawi a. Saikuti Hall pawh cheng nuai 500 senga chei ṭhat tur a nih thu leh Finance Department-ah Executive Sanction nghah mek a nih thu a sawi.

LMC Chairman Pu Lalzuithanga chuan kuminah Lunglei khawpui tan project a tam thei ang ber buaipui an tum thu sawiin, 16th Finance Commission Recommendation angin mahni puala sum dawn ve tawh an beisei thu te, 3rd State Finance Commission, SASCI, UIDF leh Central Funding hrang hrang hmangin hna an ṭan tak tak theih tawh an beisei thu te a sawi a. Traffic manangement leh sanitation chungchanga an hma lakna pawhin hma a sawn zel thu sawiin, Lunglei mipuite thawhpuina nen Lunglei khawpui chuan hma a sawn zel a beisei thu a sawi a. State University leh kalkawng chungchangah te, kawng tam takah Lungleiin Mizoram sawrkar duhsakna a dawng nasain, Lunglei aṭanga Minister leh MLA-te pawhin  Lunglei tan theihpatawp an chhuah tih sawiin, theih tawpa ṭawiawm leh thawhpui turin mipuite a sawm a. Lunglei ṭhalai rualte chu ruihhlo leh nawmchenna danga inhmang ral mai hman an ni lo tih hria a, zirna, ei zawnna leh hmasawnna kawng hrang hrangah ṭan la deuh deuh turin a chah.

Organising Committee Chairman, LMC Chief Executive Officer Pu Lalhmansanga'n hun kaihruaiin, Organising Member Rev. Dr F. Sangvela'n hunserh a hmang a. LMC Vice Chairman Pu K. Lalrinawma'n inlawmna thu sawiin, Events/Activities Committee huaihawt Lunglei Ni puala intihsiakna hrang hrang lawmman sem a ni a. LMC huam chhunga Young Mizo Association (YMA) branch hrang hrang telna Zaipawlpui chuan Pu H. Lalringa (L) hla phuah, "Leitlangpui a chul dawn lo" tih chu thiam takin an rem a. Mizo Cultural Artistes' Association (MCAA) Lunglei Sub-Headquarters, Higher and Technical Institute Mizoram (HATIM), Government J. Buana College, YMA Rahsiveng Branch leh YMA Chanmari Branch te'n hnam lam chi hrang hrang entirin, Lunglei Government College chuan Mizo hnam thuam chi hrang hrang an entir a. Esther Hnamte leh Lalenkawli Pautu te'n zaia kal khawmte awiin, Organising Secretary, Sub-Headquarters YMA Secretary Pu Zothanzuala Hnamte chuan lawm thu sawiin hun khatna a khar.

Hun hnihnaah rimawi hunpui (concert) buatsaih chhunzawm niin, Taitea Pautu, Bzi Tochhawng, Vri Pautu, Deborah Ralte, Feli Hauhnar, Rosalynd Khawlhring, Chama Thangluah, Olaftea, Vuantea, Ngurhlunzama Chhakchhuak leh Abstract Analogy te an che a. Concert kar lakah Fashion Show hmuhnawm tak buatsaih a ni bawk.

Lunglei Ni hmannaah hian LMC-a Councillor-te, Lawngtlai DC Pu Donny Lalruatsanga, Organising Committee leh Committee peng hrang hrang member-te, Lungleia sawrkar official-te leh tlawmngai pawl ai awhte, chanvo nei hrang hrang leh Lunglei mipui ṭhahnem tak an kal khawm a. Tualchhung kutchhuak thuam leh thil leh ei tur hrang hrang zawrhna stall hrang hrang hawn niin, naupang intihhlimna hmun (Kids Zone) buatsaih a ni bawk a. Lunglei Photographers' Association (LPA) buatsaih "Photo Gallery"- ah thlalak mawi tak tak pho chhuah niin, Souvenir Committee buatsaih "Lunglei Ni Souvenir Magazine" leh hriat rengna thil — kawr, lukhum, no, fridge magnet leh a dangte lei theiha chhawp chhuah a ni bawk a. Lunglei Ni pual hian intihsiakna hrang hrang buatsaih a nih bakah, Talk Show leh Seminar te buatsaih a ni bawk.

Lunglei Ni Pual Intihsiakna Hrang Hrang Lawmman Dawngtute:

(1) Thu Chheh (Essay Writing):

1st — Lalthlamuana (Ramthar) [₹5,000 + Certificate] 

2nd — Lalrohlua Pachuau (Lunglawn) [₹3,000 + Certificate]

3rd — Stephen Lalrinawma (Malsawma Pa) (Lunglawn) [₹2,000 + Certificate] 

(2) Lem Ziak (Painting):

A. Open Category:

1st — Ramdinthari (Lunglawn) [₹5,000+ Certificate]

2nd — Malsawmkima (Serkawn) [₹3,000 + Certificate]

3rd — Lalnunsanga Pachuau (Chanmari) [₹2,000 + Certificate] 

B. School Category:

1st — H. Lalrinzuali (Govt HS Lunglei) [₹3,500 + Certificate]

2nd — Haudingliana Hauhnar (Govt HSS Lunglei) [₹2,000 + Certificate]

3rd — Amy H. Zothanpuii (Govt Leitlangpui HSS) [₹1,500 + Certificate] 

(3) Au Hla (Slogan):

1st — Lalmuanpuii (Hauruang) [₹3,000 + Certificate]

"Zo nun par mawi —Leitlangpui kan vangkhua"

2nd — CVL Hmangaihsanga (Zohnuai) [₹2,000 + Certificate]

"Dikna leh rinawmna par vulna i mawi mang e, Leitlangpui!"

3rd — Jacob Rohluzuala (Lungpuizawl) [₹1,500 + Certificate]

"Lung lei anga nghet Lunglei: dam diai leh mipui inpumkhatte tual lenna" 

(4) Thlalak (Photography):

1st — C. Lalrinawma (Bazarveng) [₹3,000 + Certificate]

2nd — C. Lalsiammawia (Serkawn) [₹2,000 + Certificate]

3rd — Lalhmingliana (Rahsiveng) [₹1,000 + Certificate]

(5) Lem Che (Reels Making):

1st — Lalrohlua (Salem) [₹3,000 + Certificate]

2nd — Albert LRP (Ramthar) [₹2,000 + Certificate]

3rd — V. Lalhmangaihzauva (Chanmari) [₹1,500 + Certificate]