3805/2024-2025

Lunglei, 2025 Pawlkut thla ni 15: India rama hmeichhe naupangte chanvo humhalh a nih theih nana inzirtirna hun atana kum tin January ni 24-a hman ṭhin ni bik serh hran, 'National Girl Child Day' puala kumina ni sawm awh beihpui thlak tur chu vawiin khan Lunglei District tan Additional Deputy Commissioner Pi Rochuangkimi Khenglawt hovin DC Conference Hall-ah a hawnna hun hman a ni.

Pi Rochuangkimi Khenglawt chuan India ramah hmeichhiate'n en hran, an chanvo rah behsak leh hnuaichhiah an tuar nasa tih sawiin, Mizoram chu hmeichhe dinhmun ṭhatna ber pawl ni mah se, hmasawn ṭulna tam tak a la awm tih a sawi a. Kum tling lova inneih chungchangah hmeichhia chu a tuar nasa zawk an nih dan te, in chhungkhurah hmeichhe naupangte dinhmun a hniam zawk ṭhin dan te tar langin, mipa leh hmeichhiate'n dikna, chanvo leh zahawmna intluk tlang an neih theih nan inzirtir nasat a ṭul thu a sawi a. Hmeichhiate chawi kanna turin hmeichhia leh hmeichhia chauh inzirtir a tawk lo tiin, nu leh pa leh mipate pawh fanute, farnute leh hmeichhe dang laka rilru puthmang dik zirtir an pawimawh tih a sawi a. Thawktute chu ni sawm awh beihpui thlak turah a mamawhtu takte huap kim tura ruahmanna siam tura chahin, ṭhahnem ngai leh theih tawp chhuaha bei turin a chah a ni.

He hun hi Lunglei District Programme Officer (Women & Child Development) Pu C. Lalnunfela chuan a kaihruai a. Kal khawmte'n hmeichhiate zah tur te, en hrang lo tur te, an chanvo humhalhsak tur leh veng him tur tea intiamna thu an chham rual a. Lunglei District Hub for Empowerment of Women (DHEW)-a District Mission Coordinator (DMC) Pi K. Lalrinawmi'n NGCD campaign kalpui chhunga hma lakna tur ruahmanna tar langin, Lunglei DHEW-a Account Assistant Pu R. Lalsanglura'n lawm thu sawiin hun a khar a ni.

Kumin NGCD thupuiah hian hma hun eng tak nei tura hmeichhiate chawi kan pawimawhna, "Empowering Women for a Bright Future" tih chu thlan a ni a. Ni sawm chhung hian hmeichhiate chawi kanna atana hma lakna hrang hrang - district leh block level-a inzirtirna kawng zawh te, thing phun te, lemchan tawi (reel) insiamsiak te, lem-thu (flyer) insiamsiak te, hmeichhe zirlai naupangte zinga hmeichhe hun bi kaihhnawih hriselna leh thianghlimna (menstrual hygiene) chungchang inzirtir te kalpui tum a ni a. January ni 24-ah a ni lawmna leh campaign kharna hun hman tum niin, he hunah hian hmeichhe hlawhtling (local girl champion)-te hnenah chawimawina leh intihsiakna hrang hranga ti ṭhate hnenah lawmman hlan a ni ang a. Hemi nia hmeichhe nau piangte hnenah lawmpuina pawisa fai leh hmanrua pek tum ni bawkin, Lungleia damdawi in pathuma nau neihna pindana dah turin nebulizer pakhat ṭheuh pek tum a ni bawk.