Horticulture Department bultumin Horticulture Crop Exhibition 2017 chu Lunglei Convention Centre-ah Lunglei District tan buatsaih a ni a. Horticulture Minister Pu PC Lalthanliana chu Khuallian niin vawiin chawhma khan a hawng nghal a ni.

Pu PC Lalthanliana chuan Horticulture Department-in theihtawpin hma a la tiin, kuthnathawktute pawhin thlai thar chhuahna lama khawvel technology thar an man phak nan zirtir zel a tum thu a sawi a. Mizoram atanga ram pawna kan thawnchhuah te hi horticulture item deuh vek a ni tiin, man man zawka thawn chhuah dan kawng sawrkarin a ngaihtuah reng thu a sawi a ni. Kan rama tha duh, kan intodelh theih reng kan intodelh lohnaah hian kuthnathawktute kan in ngaihtuah chiana, trade kan tui tur kan thlan thiam a ngai a ti a, tuina tak tak nena hna thawh hi hlawhtlinna bul a nih ka ring a ni, a ti bawk.

Pu Lalliankima, Joint Director (V) pawhin exhibition chu technology thar zawk hmanga thlai thar te pholang tura buatsaih a nih thu sawiin, technology thar leh tha zawk hmanga kan hmalakna te hi mipuiin an hmuh a an zir chhawn chuan technology transfer-na remchang tak a ni dawn a ni, a ti a. Pu Vanlalnuntluanga Renthlei, DHO chuan exhibition hi kaihruaiin exhibition-a inelna thianghlim an buatsaih te hian kuthnathawktute rilruah thlai quality zawk thar duhna rilru a tuh a, miin enge an tih theih inhmuhsak in, loneitute tan a pe nasa em em a ni, a ti. Exhibit item 35 a awm thu a tarlang bawk a ni.

He hawnna inkhawmah hian Director Pu R. Zotawna, Joint Director (V) Pu Lalliankima leh Deputy Director Pu H. Lalchhuanvawra te an tel a. Horticulture Crop Exhibition 2017 hi naktukah khar a ni ang.