359/2022-2023
Lunglei the 29th, April' 2022 : Lunglei Thuamluaia Muala phullem hlui thlaka phullem thar phahna tur chu Sports Minister Pu Robert Romawia Royte in a hawng. Thusawiin Rs 500 Lakh sengin Technology thar Drain Board System hman anih tur thu a sawi a. Sports Minister hmasa Pu Zodintluanga Ralte in Mizorama a 2-na ni tura Thuamluaia muala phullem alo phah chu a hlu hle a, a rim em avang leh kum 10 chuang anih tawh avangin thlak a ngai a ni a ti. Sports Minister chuan Lungleia la awm ngai lo Aquatic Centre leh Tui hleuhna swimming pool te pawh din tura tih niin hemi atan hian cheng nuai 700 ruahman a nih thu a sawi a, Mizorama Fulsal Ground tha ber tur Pukpuiah leh Ramtharvengah din a nih dawn thu a sawi lang bawk a ni. Lunglei Rahsiveng mualah pawh Phullem phah a nih dawn bakah Sports Complex siam tum a nih thu sawi bawkin Pu Robert Romawia chuan Lunglei District chu thiam thil hrang hrang nei awm khawmna leh infiamna lamah pawh Mizoram tihmingthatu a nih thin avangin Sawrkar chuan Lunglei khawpui hmasawn nan theihtawp a chhuah zel dawn a ni a ti bawk. HPC Cup Final hmanpuitu Sports Minister chuan final kheltur Sethlun Veng leh College Veng te chu mawi taka khel tura chahin duhsakna a hlan ve ve a ni. Pu Robert Romawia Royte chuan Lunglei khawpuiin Lunglei Municipal Council a nei ve tur chu a lawmpui tih sawiin sorkar thuthmun (seat of government) anih ve tawh avangin nasa taka LMC chu Lungleiin hma a sawn phah a rin thu a sawi.

Lunglei khawpui chu a chul dawnlo tihsawiin SYS Department chauh pawhin Lunglei khawpui tan Rs 11000 lakh central sorkar atangin sanction a nei tihsawiin Chief Minister zahawm tak Pu Zoramthanga hmalaknain Lunglei khawpui chuan par a chhuang chho dawn a ni a ti.

Vawiina HPC Cup 2022 kharna inkhawm hi Lunglei District Football Association, President Pu PC. Lalramnghakan a kaihruai a, MSSC atangin Pu James Lalramnghakan Phullem phah chung chang report kim chang pe bawkin HPC Cup 2022 Final hi hmeichhe team atangin Venghlun leh Pukpui ten khelin Venghlun hi 1-0 in an chak a, Mipa team ah Collegeveng leh Sethlun ten an khel bawk a ni.

Attachment

  • Loading attachment...