1503/2024-2025

2024 Thlazing ni 9: Vawiin khan Lunglei DC Conference Hall-ah Lunglei District Bawrhsap Pu R. Lalṭhazuala hovin Lungleia Independence Day 2024 hman tur atana inbuatsaihna thlir hovin sawrkar official, zirna in, pawl hrang hrang leh kohhran ai awhte ṭhut khawm buatsaih a ni.

Chairman Pu R. Lalṭhazuala chuan member kal khawmte lawmna thu sawiin, Lungleia Independence Day hlawhtling taka hman a nih theih nan chanvo leh mawhphurhna neite chu an chanvo ṭheuh ṭha taka hlen chhuah tum turin a chah nawn leh a ni.

He hunah hian Lungleia Independence Day hman tura mawhphurhna hrang hrang neite'n hma an lak dan leh inbuatsaihna kal lai te thlir ho a ni a. Parade Committee ruahmannain August ni 8 zing aṭang khan C. Ṭhuamluaia Mualah parade practice buatsaih ṭan niin, August ni 13, 2024 zing dar 8:00-ah final rehearsal neih a ni dawn a. Independence Day atana inbuatsaihna a kal tluang tih tar lan niin, hmabak la awmte pawh tluang taka hlen chhuah theih beisei a ni.

Lungleia Independence Day 2024 lawmna hi C. Ṭhuamluaia Mualah August ni 15, 2024 (Ningani) zing dar 9:00-ah hman a ni dawn a. PWD Minister Pu Vanlalhlana chu Khuallian tura beisei a ni a. Independence Day lawmna ceremonial parade buatsaih a nih bakah, Khuallianin thu sawiin, lawmman chi hrang hrang sem a ni ang a. Chhun lamah Circuit House-ah VIP At Home buatsaih a ni bawk ang.

Ruahman lawk dan chuan Independence Day ni-ah hian Khuallian chuan zing dar 9:00-ah C. Ṭhuamluaia Mual thlengin, India ram puanzar a pawt pharh nghal ang a. Zing dar 9:05-ah Khuallianin parade contingent-te en kualin, dar 9:10-ah ceremonial parade-in a chhunzawm ang a. Dar 9:35-ah Khuallianin thu sawiin, Khuallian thu sawi zawhah mi hming ṭha leh hlawhtlingte chawimawina leh parade leh infiamna lawmman chi hrang hrang sem a ni ang a. Dar 11-ah ceremonial function hi zawh fel theih beisei a ni.

Lunglei District-a chhawmdawlna in, damdawi in leh District Jail-ah te Independence Day pual hian ṭanpuina thilpek pek a ni leh dawn a. Independence Day Celebration Committee-in a remtihpui angin sports discipline ṭhenkhat - football, table tennis, carrom leh snookers/billiards te chuan Independence Day 2024 puala inelna (tournament) an buatsaih bawk.

Independence Day 2024 pual hian sawrkar laipui chuan ram chhung in tina ram puanzar (national flag) zar tura hma lakna, "Har Ghar Tiranga" chu August ni 13 - 15 chhung kalpui leh turin ruahmanna a siam a. Hemi chhung hian sawrkar office, zirna in, sawrkar quarters leh mimal inah te India ram puanzar zar ṭheuh turin Lunglei District Independence Day Celebration Committee  chuan District mipuite a ngen a. Sawrkar hna thawkte chu Independence Day lawmnaah tel ngei tura beisei niin, mipuite pawh Independence Day lawmnaa tel vek turin Celebration Committee chuan a sawm bawk a ni.