1770/2026-2027

Lunglei, 2026 Thlazing ni 13: Tukin zing dar 9:00 khan C. Ṭhuamluaia Mual, Lungleiah August ni 15, 2026 (Inrinni) zing dar 9:00 aṭanga Lungleia Independence Day 2026 lawmna hun hman tur atana inpuahchahna leh en lawkna hnuhnung (final rehearsal) buatsaih a ni.

He hunah hian District Bawrhsap Pi Navneet Mann leh Superintendent of Police Pu J. Lalmuankima te bakah, official hrang hrangte telin, Independence Day ceremonial parade-a lam tur sipai leh zirlaite an kal khawm a. Independence Day lawmna hun hman dan tur duan lawk sa anga hun hman chhin niin, tluang tak leh felfai taka hun hman a ni.

Ruahman lawk dan chuan, kumin Independence Day lawmna hi Lungleia C. Ṭhuamluaia Mualah August ni 15, 2026 (Inrinni) zing dar 9:00-ah hman tur niin, Health & Family Welfare Minister Pi Lalrinpuii chu Khuallian a ni dawn a. Dar 8:50 a.m.-ah Lunglei SP-in C. Ṭhuamluaia Mual thleng hmasain, dar 8:55 a.m.-ah Bawrhsapin Mual a thleng ang a. Dar 8:59 a.m.-ah Khuallianin Mual thlengin, dar 9:00 a.m.-ah India Hnam Hla (National Song), "Vande Mataram" sak/zaitir a ni ang a. Khuallianin Hnam Puanzar pawt pharhin, Hnam Hlapui (National Anthem) rimawi tumin a chhunzawm ang a. Dar 9:05 a.m.-ah Khuallianin lam turte endikin, hei hi dar 9:10 a.m. aṭangin rimawi kal rema lam urhsun (ceremonial parade)-in a chhunzawm ang a. Dar 9:35 a.m.-ah Khuallianin thu sawiin, lawmman hrang hrang a sem chhunzawm ang a. Hnam Hla sak leh Hnam Hlapui rimawi tum hmanga hun khar niin, Muala Independence Day lawmna hun hman zawh, chawhma dar 11:30-ah Circuit House-ah 'VIP At Home' thingpui ruai buatsaih a ni ang.

Lungleia Independence Day hman turah hian ceremonial parade-ah armed contingent 6, unarmed contingent 9, school contingent 10 leh pipe band 2, a vaiin contingent 27 an awm dawn a. Lunglei District Independence Day Celebration Committee chuan Independence Day lawmnaah hian tel vek turin Lunglei District mipuite an sawm a ni.