4962/2025-2026

Lunglei, 2026 Vau thla ni 23: Vawiin khan Lunglei District Water & Sanitation Mission (DWSM) huaihawtin Lunglei DC Conference Hall-ah March ni 8–22, 2026 chhunga chawlhkar hnih awh Tui Kut, "Jal Mahotsav" (Water Festival) hman zawh tak kharna hun leh kum tina March ni 22-a hman ṭhin, khawvel pum huapa tui ngaihhlut inzirtir ni, "World Water Day 2026" lawmna hun buatsaih a ni.

He hun hi Lunglei Election Officer Pi Lalhruaitluangi chuan kaihruaiin, tui chu mihringte nun khaw chhuah nana mamawh bulpui pakhat a nih avangin a renchem leh humhalh kawngah mi tinin tha thawh leh ṭan lak a ṭul thu a sawi a. Sawrkar leh department hma lakna chauhva innghat lovin, mi tinin ngaihven a ṭul tih sawiin, tui chungchanga hma lakna chu khua leh tui zawng zawng, a hmei a paa kan mawhphurhna a ni, a ti.

Lunglei DWSM Member Secretary, PHED Lunglei Rural WATSAN Divison-a Sr Executive Engineer Dr ZR Ṭhasangzuala chuan Lunglei District-a Jal Mahotsav kalpui dan report tlangpui a tar lang a. Jal Mahotsav chhung hian Lunglei District chhunga khaw thlan bikahte khawtlang hruaitute leh Village Water & Sanitation Committee (VWSC) member-te nen tui hlutna, tui renchem leh humhalh pawimawhzia inzirtirna leh infuih phurna buatsaih a nih thu te, khaw tina VC leh VWSC te'n an tui lak ṭhat leh ṭhat loh zir chiang a, Jal Seva Ankalan (Water Service Assessment) portal-a an thun thu te a sawi a. Jal Seva Ankalan report aṭang hian thingtlang khuate'n hnianghnar zawka tui an hmuh reng theih nana hma lak dan tur ruahmanna, "District Improvement Plan" duan tur a nih thu a sawi a. Jal Mahotsav 2026-ah hian Lunglei District Belthei khaw tuipu, Pu K. Chondro chuan Mizoram pum huapa tuipu ṭha lawmman, "Outstanding Nal Jal Mitra/Water Operator Award" a dawn thu leh vawiina Aizawla World Water Day hmannaah Award hi hlan a nih thu a tar lang bawk.

District Improvement Plan ruahman dan tur rawtna sawi ho nghal a ni a. Jal Seva Ankalan report aṭanga a lan danin Lunglei District chhunga thingtlang khaw ṭhenkhatah an tui lak hnarah tui hna a tlem tial tial tih tar lan niin, in tina tui la pek kim lohte pawh an awm tih tar lan a ni a. Jal Jeevan Mission (JJM) hnuaia in tina tui pe tura hma lakna (Har Ghar Jal) kalpui laia in dingte chu tui pek kim an nih thu tar lan niin, hetih laia in la awm lote chu scheme a zawh tawh avangin a hranpaa pek theih an nih tawh loh avangin, inkaihhruaina awm sa angin tui connection mamawh belhte chu VWSC-in ruahmanna an siampui a, a senso pawh anmahnia an inngaihtuah a ngaih thu tar lan a ni a. Ramngaw hi tui hna vengtu leh tipungtu bakah, tui tithianghlimtu a nih avangin tui lakna hnara ramngawte humhalh a, ramngaw tihchereu loh bakah, thing phun belh zel tura hma lak a pawimawhzia sawi ho niin, hemi kawngah hian nasa zawka hma lak ni se, tih a ni a. Tui renchem leh ruahtui khawl khawm chungchangah te, department hrang hrang (PHED, RD&A, IWRD, LRS&WC, EF&CC, etc.) te nen thawk hova tui luang ral tur venna ruhrel hrang hrang siam kawngah te awmze nei zawka hma lak dan kawng zawn ni se, tih a ni bawk.

JJM hnuaiah PHED chuan thingtlang khaw hrang hranga an tui tlan a thianghlim leh thianghlim loh an endik ṭhin bakah, khaw tinin anmahnia an endik theihna tur, Field Testing Kit (FTK) pek leh a hman dan zirtir an ni a. JJM sum hmuh a tawp tak avangin leh FTK-a damdawi hman tur inpek chu a thih tawh avangin khaw hrang hrangte tui tlan endik dan turah a remchan danin PHED, RD&A leh VWSC te nen inrawn tlanga ruahmanna siam dan tur ngaihtuah ni se, tih a ni a. Khaw tinin ṭha zawka tui hnar ramngaw an humhalh theih nan DWSM hmingin inzirtirna leh  ngenna lehkha thawn chhuah ni se, tih a ni bawk.