DIRECTORATE OF INFORMATION & PUBLIC RELATIONS, Government of Mizoram, India

4166/2024-2025

Lunglei, 2025 Ramtuk thla ni 10: Vawiin khan Lunglei District Level Committee on Fire Prevention (DLCFP) leh Govt J. Buana College-a National Service Scheme (NSS) leh Eco Club te ṭang ho huaihawtin Kangmei Ven Hapta (Fire Prevention Week) 2025 hawnna hun chu Govt J. Buana College Multipurpose Hall-ah hman a ni a. Lunglei District Additional Deputy Commissioner Pu James Miahlung chu khuallian a ni.

Khuallian Pu James Miahlung chuan kangmei chhuak vanga ramngaw, nungcha, tuihna, boruak leh mihringin kan tuar nasatzia sawiin, kangmei tichhuak lo tura fimkhur leh kangmei ven chu khua leh tui zawng zawngte mawhphurhna a ni, a ti a. Mi thiamte zir chianna aṭangin kangmei chhuak za zela sawmkua (90%) vel chu mihringte vanga chhuak a ni tih tar langin, fimkhurna aṭangin kangmei chhuak tur tam zawk chu pumpelh theih a ni, a ti a. Lunglei District-a kangmei vanga harsatna leh chhiatna lo thleng tawh chu zirlaia hman a, kan tu leh fate'n harsatna an tawh loh nan ṭan tlan a ṭul tiin, kal khawmte chu kangmei ven ngai pawimawh tur leh mi dang pawh zirtir zel turin a chah a ni.

"Kangmei ven hi kan tu leh fate hmakhua atan a ni" tih thupui hmanga February ni 10 - 15, 2025 chhunga Kangmei Ven Hapta hman tur hawnna hun hi Environment, Forests & Climate Change (EF&CC) hnuaia Lunglei Range Officer (RO) Pu Lalnunthanga'n a kaihruai a. DLCFP Member Secretary, Lunglei Forest Division-a Divisional Forest Officer Pu Lalduhthlana chuan Lunglei District chhunga ram kang dinhmun leh ṭan lak a ngaihna laite a tar lang a. Mizoram Journalists' Association (MJA) Lunglei District President Pu Laltlanthanga kaihhruaiin mipui kal khawmte chuan kangmei tichhuak lo tura intiamna an chham rual a. Kangmei tichhuak lo tura intiamna hi Kangmei Ven Hapta pual hian Lunglei District-a sawrkar pisa hrang hrangah thawktute'n an chham rual bawk a ni.

Lungleia Kangmei Ven Hapta hawnna hunah hian Fire & Emergency Service, Lunglei aṭangin kangmei laka fimkhurna tur thuchah ngaihthlak a ni a. Kangmei chhuah thulhah state fire emergency number 112 bakah, Lunglei Fire & Emergency Service landline number - 0372-2325366 emaw, 0372-2324101 emaw, mobile number 8794889383 emaw kal tlangin biak pawh theih an nih thu tar langin, kangmei chhuah thu report-tute'n kangṭhelh motor tana kalkawng awlsam ber te, kangmei chhuah chhan leh eng nge kang tih te leh thil pawimawh tur te sawi tel nachang hriat a pawimawh thu an sawi.

He hunah hian Kangmei Ven Hapta puala lemchan tawi (reel) insiamsiak lawmman sem nghal niin, pakhatna Chhana Bawlte (Bazarveng, Lunglei), pahnihna Kawl En Show (Lunglei) leh pathumna ṬKP Sadraka Group (Chanmari Vengthlang, Lunglei) te an ni a. Zaithiam zai te ngaihthlak niin, Young Mizo Association (YMA), Lunglei Sub-Headquarters President Pu K. Lalfakzuala'n lawm thu sawiin hun a khar a ni.

Kumina Kangmei Ven Hapta hman chhung hian Lunglei District chhungah kangmei venna lam inzirtirna (awareness campaign) uar zawka kalpui turin VC leh tlawmngai pawlte nen thawk hovin department lamin hma an la dawn a. Media kal tlanga sawi hona, thuchah leh inzirtirna hrang hrang tihchhuah te, kohhran inkhawma thu puantir te, vantlang tlangau hmanga inzirtirna puan leh intihsiakna buatsaih te pawh tum a ni a. Kangmei ven kawnga thawk ṭha khuate chawimawina 'Village Level Fire Prevention Award 2025' pawh siam leh tum a ni.

Fire Prevention Week hi Mizoramah kum 2000 aṭang khan hman ṭan niin, kumin hi a ṭum 26-na a ni a. Kum 2009 aṭang khan district leh village level fire prevention award sem ṭan niin, kumin pawh hian award hi sem leh tum a ni.

Attachment