868/2026-2027

Lunglei, 2026 Nikir thla ni 5: Vawiin khan Lunglei District SDC Steering Committee chu Sub-Divisional Officer (Sadar) Pi TT Beikhaizi kaihhruaiin Lunglei DC Conference Hall-ah an ṭhu khawm a. Lunglei District chhunga kawṭhalo (diarrhoea) vanga naupang thihna a thlen lohna tura ni 45 (June 16 - July 31, 2026) chhung beihpui thlak, STOP Diarrhoea Campaign (SDC) 2026 kalpui dan tur an sawi ho.

He hunah hian Lunglei District Senior Chief Medical Officer Dr Lalrinthangi chuan Stop Diarrhoea Campaign kalpui a ṭul chhan leh he campaign kalpui tura ruahmanna awm sate a tar lang a. SDC chu kawṭhalo vanga naupang kum 5 hnuai lam thihna thleng ṭhin venna tura ruahman a nih thu tar langin, nikuma STOP Diarrhoea Campaign kalpui dan report a tar lang bawk.

Lunglei District tana STOP Diarrhoea campaign kalpui tur hi June ni 16, 2026 (Thawhlehni)-ah primary school remchangah a bul ṭanna hun hman ni se tih niin, hun hman dan tur kimchang chu SCMO Office-in lo ruahman se, tih a ni a. SDC hlawhtlin nana department hrang hrang – Health & Family Welfare, School Education, Women & Child Development, Public Health Engineering leh tlawmngai pawlte mawhphurhna lwh pawimawhna te sawi ho niin, mahni zawnah ṭheuh theih tawp chhuah leh tura inngen a ni.

SCMO report aṭanga a lan danin, nikum 2025-a SDC kalpui chhung khan Lunglei health district (Lunglei District leh Hnahthial District inkawp) chhungah kawṭhalo ven/enkawl nan ORS leh Zinc tablet pek tur naupang kum 5 hnuai lam 13,684 tinzawn niin, mi 13,118 (95.9%) hnenah pek a ni a. Kumina SDC kalpui chhung hian Lunglei District bikah naupang kum 5 hnuai lam 10,952 tinzawn niin, ORS bawm (packet) 2 zel leh Zinc tablet mum 14 zel pek tura ruahman a ni a. Kum dang ang bawkin, kawṭhalo ven beihpui thlak chhung hian anganwadi centre, sikul leh damdawi in hrang hrangahte ORS & Zinc Corner siama damdawi (ORS & Zinc) sem hi kalpui a nih dawn bakah, kawṭhalo ven dan leh enkawl dan te, tui thianghlim in leh hman pawimawhna te, kut sil fai pawimawhna leh kut sil fai dan te, faina leh thianghlimna chungchanga naupangte leh anmahni enkawltute tana hriat tur pawimawh hrang hrang inzirtirna te buatsaih leh a ni bawk ang. 

Health department report aṭanga a lan danin, nikum 2025 STOP Diarrhoea Campaign kalpui chhung khan Lunglei District chhungah naupang kum 5 hnuai lam kawṭhalo vei 99 (mipa 44 leh hmeichhia 55) hriat chhuah an ni a. Kawṭhalo vanga thi erawh an awm hriat a ni lo. Nikum chhungin Lunglei District chhung khaw 145-ah Village Health, Sanitation & Nutrition Day-ah faina chungchang inzirtir a ni a. Primary school 234-ah leh anganwadi centre 402-ah kut sil dan inzirtir a ni bawk.