DIRECTORATE OF INFORMATION & PUBLIC RELATIONS, Government of Mizoram, India

4509/2024-2025

Lunglei, 2025 Vau thla ni 3: Tukin zingkar khan Mizoram Health Systems Strengthening Project (MHSSP) hma lakna hnuaiah Lunglei khawpui chhungah hriselna atana kea kal runpui, "Walk for Health Walkathon 2025" buatsaih a ni.

Lunglei khawpui chhunga walkathon buatsaihah hian sawrkar official-te, khawtlang hruaitute, pawl hrang hrang - YMA, MHIP, MUP, MJA, adt. member-te, kohhran ṭhalai member-te, college NSS leh sikul zirlaite, naupang aṭanga upa kum 90 chung lam thlengin mi 2,000 vel telin, a telte zinga upa ber chu Pu Saidawla, Ramthar Veng (kum 90) a ni a. Walkathon-ah hian Lunglei Chanmari veng chin chhim lam zawnga mite chu AOC petrol pump kawt aṭanga kal ṭanin, Lunglei Venglai chin hmar lam zawnga mite chu Kikawn BCM Biak In kawt aṭangin an kal ṭan thung a. Kawng dung zelah kea kalin, Lunglei Venglaia Tennis Court hlui an pan khawm a. Hemi hmunah hian a kharna hun buatsaih zui a ni.

Walkathon kharna hi Lunglei District Senior Chief Medical Officer Dr LC Liana chuan kaihruaiin, inlawmna thu a sawi a. Sub-Committee on Walkathon Chairman, Lunglei District Additional Deputy Commissioner Pu James Miahlung chuan Mizoramin natna inkai chhawn theih loh, non-communicable disease (NCD) vangin harsatna chi hnih - sum leh pai phurrit leh natna phurrit kan tawk mek tih sawiin, NCD natna laka fihlim turin ei leh in uluk bakah taksa sawizawi ṭhat a pawimawh tih a sawi a. Rilru leh taksa hrisel nan kea kal chu a pawimawh hle tih sawiin, kea kal uar deuh deuh turin District mipuite chu a chah a ni.

He hunah hian Zobawk PHC-a Medical Officer Dr Noel Lalremruata Sailo chuan NCD natna chungchang leh a invenna tura nunphung uluk pawimawhna te a sawi a. District Hospital Quality Manager Pi Lalchhanmawii kaihhruaiin kal khawmte'n kea kal ngai pawimawh leh nunpui tura intiamna an sawi rual a. Zai thiamte zai ngaihthlak niin, Dy CMO Dr Lalrinthangi'n lawm thu sawiin hun a khar a ni.

Mizoram mipuite kan lo hrisel zawk nan MHSSP hnuaiah "hriselna atan kea kal", (walk for health) tih thupui hmangin Mizorama district pangaah district level-ah leh khaw 510-ah village level-ah walkathon hi buatsaih tura ruahman a ni a. Lunglei District-ah chuan vawiina Lungleia district level walkathon buatsaih bakah hian March ni 1 - 4, 2025 chhungin khaw hrang hrang 114-ah village council/local council te kaihhruaina hnuaiah village level walkathon hi buatsaih turin ruahman a ni.

Attachment