360/2024-2025 

LUNGLEI; the 25th, April, 2024: Vawiin chawhma khan Senior Chief Medical Officer's Office chamber Lunglei ah khawtlang hruaitu/ kohhran hruaitu te leh zirna in te nen World Malaria Day denchhenin advocacy meeting neih a ni. Kumin thupui chu "Accelerating the Fight Against Malaria for a more Equitable World" (Hriselna kawng a intluktlan nan, Malaria ti bo tur a chak zawk a hmalak) a ni.

He hun hi Dr. LC. Liana, Senior Chief Medical Office, Lunglei chuan kaihruaiin Dr. LC. Liana chuan India ramah Malaria hi a hluar hle a, mihring tam takin Malaria vangin nunna an chan tawh a ni. Mizoram ah pawh Malaria hi a hluar hle a, Lunglei District hi Mizoramah Malaria vei tamna ah pahnihna a nih thu a sawi a. Malaria hi Health Deparment chauh in a do thei lova, mipuite tel lo chuan kalpui a harsat thu a sawiin a huhova hmalakpuiah a sawm a ni.

Lunglei District (Undivided Lunglei leh Hnahthial) chhungah khua 193 awmin mihring 70825 an awm a, Malaria Technical Supervision Unit 5 Hnahthial, Buarpui, Lungsen, Tlabung leh Bunghmun te a awm, kum 2022 ah Malaria vei 2890 awmin kum 2023-ah 4950 an awm thu tarlan a ni. Kum 2023, January - December chhungin Malaria vangin Lunglei District ah mitthi 3 an awm a ni. Kum 2024 chhunga hmalak tawhna leh hmalak tur te chu IRS Deltamatherine hmangin khaw 187 tuam tum a ni, khaw 174-ah LLIN thosilen semchhuah bakah IRS khaw 6 ah thosilen chiah a ni ang. Self Help Group leh NGO te nen tuichhe tlinna leh thosi pian theihna tihfai te, Dengue laka invenna lamah te  hmalak a ni ang. Malaria tamna hmun ah khawtlang hruaitu, NGO te leh mi pawimawhte nen meeting neih bakah ICMR ten Tlabung lamah Malaria thosi  leh damdawi thlenga zir chianna an nei bawk a ni.  Malaria chungchangah awareness campaign hmun hrang hrangah neih niin Cable TV kaltlangin talk show te, LLIN leh IRS awareness message chanchinbu leh TV kaltlanga neih bakah Missionary Worker te nen puanzar kawnga hmalak te a tel a ni. Lunglei District chhungah January - December 2023-ah Dengue sample 2188 test-ah 179 te chu confirm an ni.

Vawiin advocacy meeting-ah hian NGO, kohhran hruaitu te aiawh leh 20 Bn BSF Zotlang te an tel a ni.