No.1386/2020-2021

Lunglei the 26th,May’2020 : Lunglei District mi leh sa tangkhang lo haw te khunghranna atana hman tur kohhran hall (Community Quarantine Centre) te inkaihhruaina leh hriattur pawimawhte zirhona hun Awareness campaign chu vawiin khan Lunglei Lunglawn East kohhran Hall ah neih a ni. He hunah hian sawrkar official-te, doctor –te leh Kohhran hruaitu, VLTF-te an tel a ni.

He Awareness Campaign hi Pu Tlangtimawia Zote, DAO, Lunglei leh Officer incharge in kaihruaiin Pi C. Laltleipuii, Settlement Officer leh Magistrate ni bawk chuan Mizoram Sorkar ruahmanna angin State danga tangkhang Mizo unau te hruai haw mek an ni a,lo haw te khunghranna tur Community Quarantine Centre atana Kohhran Hall hman phalsak anih avangin kohhran leh VLTF te chungah lawmthu a sawi a ni.

Dr. LC. Liana, District TB Officer, Lunglei chuan Covid 19 hri chungchang leh inkaihhruaina te sawiin pawng hlauh in awmzia a nei lova, sorkar in inkaihhruaina a siam te fimkhur taka kan zawm theuh chuan kan him tlang thei a ni, a ti. Covid 19 darh lohnan inkaihhruaina hengte kut silfai, mask vuah, social distancing te hi zawm theuh turin community quarantine centre mawhphurtute a chah a ni. Community Quarantine tur te hi Rapid Antibody Test (RAT) paltlang te chauh dah an ni ang a, an awm chhung a bawlhlawh tlingkhawm te chu tih thianghlima paih a ni ang. Bawlhhlawh sawngbawl tawhte hi CQC-a collection point atangin UD&PA-in paih turin an la khawm dawn a ni.

Vawiin awareness campaign ah hian kohhran pali - BCM Ramthar, PCI Ramthar, BCM Lunglawn leh BCM Lunglawn East te an tel a ni.

Tun dinhmunah Lunglei District-a kohhran 20 ten community Quarantine facility atan an hall hman an remti a. BCM Rahsiveng, PCI Chanmari, BCM Bazar Zobawk N leh Synod Mission Centre Salem te hman tan tawh niin heng Centre-ah te hian mi 8 an awm mek a ni.

Tun dinhmunah Lunglei District-ah khunghran (quarantine) mek mi 190 an awm a. Hengte hi sawrkar quarantine facility ah mi 139, mahni inah (home quarantine) mi 43 leh kohhran hall (community quarantine) mi 8 te an ni.