4378/2025-2026

Lunglei, 2026 Ramtuk thla ni 10: Vawiin khan Lunglei District Republic Day Celebration Committee chu Additional Deputy Commissioner Pi Rochuangkimi Khenglawt hovin Lunglei DC Conference Hall-ah an ṭhu khawm a, Lungleia kum 2026 Republic Day hman dan an thlir let.

Chairman Pi Rochuangkimi Khenglawt chuan Lungleiah tluang tak leh hlawhtling taka Republic Day 2026 hman zawh a ni chu lawmawm a tih thu sawiin, committee-in mawhphurhna hrang hrang a pekte'n ṭha taka an chanvo leh mawhphurhna an hlen chhuah avangin lawm thu a sawi a. Republic Day hlawhtlin nana sum leh tha thawhtu — sawrkar department hrang hrang leh institution hrang hrangte, Lunglei Municipal Council (LMC) te, sikul naupang leh zirtirtute, local council te, MJA, Akashvani leh Cable TV te, tlawmngai pawl hrang hrang, kohhran, sport discipline hrang hrang leh mipuite chungah lawm thu a sawi.

He hunah hian department hrang hrang leh zirna in ai awhte, pawl hrang hrang leh kohhran ai awhte an tel a. Kal khawmte chuan Lungleia Republic Day 2026 hman dan chu hlawhtling leh felfai thawkhat an tih thu sawiin, a buatsaih dana ṭha leh zawngchhang tlak nia an hriat te, hma lam huna felfai leh hlawhtling zawka ram ni pawimawh hman a nih zel theih nana rawtna hrang hrangte an sawi ho va. Republic Day 2026 lawmna atana office hrang hrang aṭanga sum thawh khawm dan leh hman chhuah dan thlir ho niin, sum thawhtu department hrang hrang leh DC Office tana phurrit ni lo tur leh hautak lo zawka ruahmanna kalpui a nih theih dan tur rawtnate sawi ho a ni bawk.