1286/2025-2026

Lunglei, 2025 Vawkhniahzawn thla ni 22: Vawiin khan Leitlangpui Music Festival (LMF) 2025 Working Committee chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah a ṭum khat nan an ṭhu khawm.

Chairman Pi Navneet Mann chuan member-te lawmna thu sawiin, Leitlangpui Music Festival chu nikum 2024-a hlawhtling taka buatsaih a nih angin kuminah pawh hlawhtling lehzuala buatsaih a nih theih nan member-te chu uluk taka ngaihtuahna seng tur leh theih tawp chhuah turin a chah.

Working Committee Secretary & Lunglei Municipal Council (LMC) Chief Executive Officer (CEO) Pu Donny Lalruatsanga chuan nikum lama LMF buatsaih dan tar langin, November ni 14-16, 2024 inkar chhungin LMF chu hlawhtling taka buatsaih a nih thu a sawi a. Working Committee Vice Chairman, Tourism Department Director Pi R. Lalrodingi chuan LMF 2024 hlawhtlinna atana tha thawhtu–sawrkar department, event management team, NGO leh pawl hrang hrang, media, mimal leh mipuite chungah lawm thu sawiin, kumina LMF buatsaih leh tur atana ruahmanna awm sate a tar lang bawk.

June ni 12, 2025-a Tourism Minister Pu Lalnghinglova Hmar hova LMF 2025 Organising Committee ṭhu khawmin a lo pawm tawh angin, Leitlangpui Music Festival 2025 hi November ni 13-15, 2025 (Ningani-Inrinni) chhungin a hmun ngai, Pukpui Kawmzawlah buatsaih leh tura ruahman a ni a. Zai, lam, hnam thil leh kut them thiam thil pho chhuahna, thuam leh ei leh in chi hrang hrang zawrhna leh intihhlimna chi hrang hrangte buatsaih leh tura ruahman niin, vawiin Working Committee ṭhut khawmah hian sawrkar department hrang hrangte leh pawl hrang hrangte chanvo leh mawhphurhna turte sawi ho va, ruahman a ni a. LMF 2024 hman dan thlir let ni bawkin, ruahmanna ṭha zawk leh felfai zawk a awm theih nana rawtna hrang hrangte sawi ho a ni bawk.

He ṭhut khawmah hian LMF 2024 buatsaih nan Ministry of Tourism aṭangin cheng nuai 25, North Eastern Council (NEC) aṭangin cheng nuai 10 leh Mizoram sawrkar aṭangin cheng nuai 10, a zavaiin cheng nuai 45 hmuh a nih thu tar lan niin, huaihawt leh buaipui ngai hrang hrang buaipui turin, event management agency (EMA) atan tender hmangin Brighter Co. leh BBY Animals te kum thum chhung atan inremna siampui an nih thu tar lan a ni a. Kumin LMF 2025 atan Tourism Ministry aṭangin cheng nuai 25 leh Mizoram sawrkar aṭangin cheng nuai 25, a zavaiin cheng nuai 50 hmuh beisei niin, sum hnar dang dap turin Tourism Director kaihhruai Sponsorship Committee din a ni bawk a. LMF hi sawrkar bul tuma huaihawt a nih angin Working Committee chuan EMA te leh sawrkar department hrang hrang te, pawl hrang hrang leh mipuite thawhpuina ṭha tak nen hlawhtling taka buatsaih leh theih beiseiin, an thawhpuina pawh a ngen nghal a ni.

Working Committee ṭhut khawmah hian Leitlangpui Music Festival hi hnam ziarang leh ro hlu chawi larna leh vawn ṭhatna bakah, ei bara hmasawnna atan leh khualzin tam zawk hip luhna tura ram pawn thleng pawha thawm nei tura ruahman leh beisei a nih thu tar lan niin, mipuite pawhin inhawng tak leh neitu thinlung pu-a dawnsawn leh hman thiam a pawimawh thu tar lan a ni a. LMF 2024-ah Lungleia khualbuk leh sumdawng eng emaw zatin sum ṭhahnem tak an lak luh phah thu tar lan niin, member-te chuan sum leh pai lak luhna kawnga mipuite tana remchang awm chu hlu an tih thu leh ṭangkai lehzuala hman theih a nih an beisei thu an sawi.