2070/2023-2024

Lunglei the 29th, September, 2023: Vawiin khan Art & Culture Auditorium,Lunglei ah Mizo Academy of Letters, Aizawl leh Mizo Academy of Letters, Jt. Hqrs Lunglei tangduna buatsaih Leitlangpui Ziak Mite Kutchhuak leh An Chhehvel Dan Zir Chianna Seminar hun hman a ni. He hun ah hian Pu C. Lalrinsanga, Minister, Agriculture, Irrigation & Water Resources leh Cooperation Department changtu chu khuallian niin Dr. Vanlaltanpuia, MLA leh Chairman, Mizoram Youth Commission chu khualzahawm a ni.

Seminar hun hi Prof. R.L. Thanmawia, President MAL, Aizawl chuan kaihruaiin khuallian Pu C. Lalrinsanga chuan thil ziak leh document dah that pawimawh thu a sawi a, document hlui tangkai zawk a hman a nih theih nan leh neih theihna dan Cabinet meeting pawn a pawm a ni a ti. Ziak mite dawmkan nan an thu ziak te pholan leh promote a tul thu a sawi a, ziak mite hian thil chi hrang hrang kan ram economy a san theih nana ei leh bar a intohdelh te, hnam ang a ke kan penna ah hnam dinchhuah nan nationalism te, faina kawng ah te, rinawmna hlutzia te leh inrenchemna hawi zawng thuziak nise, a hlu hle dawn hle a ni a ti. Hemi bakah hian kuthnathawh uar lam hawi zawng ziah te hi a tangkai tur thu sawiin Mizo tawng hmandik leh lamdik lama kan hausak zawk nan tan lak a ngaih thu a sawi bawk.

Khualzahawm Dr. Vanlaltanpuia, MLA leh Chairman, Mizoram Youth Commission pawhin thusawiin ram leh hnam ropui apiangin ziak mite sulhnu hnutchhiah hi an ngaipawimawh a, thangthar leh mithiam ten research tih nan an hman thin thu a sawi a. Mizo history chawinun te, thil bul chhui nan te a tangkai tur thu a sawi bawk. Mizo ziak mite thu ziak a hausa tur chuan thu inchuh (debate) lian tak buatsaih a ngaidan hrang hrang sawichhuah ni thei se a tangkai tur thu sawi a, thu leh hla lam hma kan sawn theih nan tawng hman dik uluk a ngaih thu a sawi a ni.

Vawiin seminar thupui zir hi hun hnih a then niin hunkhatna hi Pu C. Laizawna, Executive Committee Member, MAL Aizawl kaihhruaina ah hian Pi C. Lalruatpuii, Asst. Professor, Lunglei Govt. College in Lalzova leh Art, Pu C. Zalianthanga, Tahan, Myanmar in Mizo thu leh hla tona, Leitlangpui, Pu T. Vanlalhruaia'n C. Thuamluaia sulhnu leh Pu Familia Laltansanga Fanai in Saikuti Hlaa Khuarel tih thupui an zir ho a ni. Thupui zir thawhhnihna hi Pu K. Vanlalzama, Asst. Tresurer MAL, Jt. Hqrs. Lunglei chuan kaihruaiin Pu K. Lalringzuala Pachuau in Chhawnthang pa leh a hlate, Pu Lalrinchhana, PG zirlai Pachhunga University College in H. Lalringa hlaa khuarel thilsiam tar lan anih dan, Pu Lalhlimpuia, Lecturer, Baptish Higher Secondary School, Serkawn in Serkawn Concert Hla ten Mizoram Mawina an pho chhuah dan leh Pu Rochharzela, Asst. Professor, Lunglei Govt. College in Leitlangpui ziak mi ten Lunglei an tar lan dan te an zirho a ni.

Seimnar hawnna ah hian Pu C. Hrangdula, President, MAL.Jt.Hqrs. Lunglei in inlawmna thu a sawi a, Pu TC Jonunsanga, Coordinator/Secretary, MAL, Jt. Hqrs, Lunglei in keynote sawiin Pu K. Darchhawna, Vice President, MAL, Jt. Hqrs. Lunglei in lawmthu a sawi a, zawhna leh chhanna hun hman a ni bawk.