1466/2026-2027

Lunglei, 2026 Vawkhniahzawn thla ni 21: Labour, Employment, Skill Development & Entrepreneurship (LESDE) Department Lunglei leh Government J. Buana College (GJBC) ṭang kawp huaihawtin vawiin khan Govt J. Buana College, Lungleiah hna zawngtute leh hna thawk ruaitute intawh khawmna kutpui, "LESDE Job Fair & Career Fair 2026" buatsaih a ni a. He Fair hi Ministry of Labour and Employment (MOLE), Government of India hnuaia National Career Service Project (NCSP) kal tlanga Model Career Centre Scheme aṭanga buatsaih a ni.

GJBC Multipurpose Hall-a Job Fair hawnna hun buatsaih hi Lunglei District Bawrhsap Pi Navneet Mann chuan a hmanpui a. Lunglei ṭhalaite'n district leh state hmasawnna atan tih theih tam tak an neih thu sawiin, mahni intodelh tur leh chhungkua leh khawtlang tana mi ṭangkai ni turin eizawnna ngelnghet neih a pawimawh thu a sawi a. Sawrkar hna chu hna nghet leh him ni mah se, tunlai khawvelah eizawnna kawng awm chhun a nih tawh loh thu sawiin, sawrkar hna chauh thlir lo va, sumdawnna leh mahni thiam thil hmanga eizawnna remchang awm hrang hrangte chhawr ṭangkai turin a chah.

Bawrhsap chuan entrepreneurship, internet leh social media hmanga sumdawnna (e-commerce) leh private sector-a hna hrang hrangte chu eizawnna tlak a nih thu sawiin, Mizoram leh Lungleiah ngei pawh tualchhung sumdawng hlawhtling te, Self-Help Group (SHG) leh ei tur sawngbawlna (food processing unit) ṭha leh entawn tlak tak tak an awm thu a sawi a. Zirlaite'n college an kal chhungin lehkha zirna tluang pangngai bakah, vocational training leh thiamna (skill) dangte pawh ngai pawimawh a, mahni hmasawnna tura theihna hrang hrang an neihte chher hriam turin a chah.

LESDE Department leh Govt J. Buana College ṭang kawpin Job Fair & Career Fair an buatsaih chu lawmawm a tih thu sawiin, Pi Navneet Mann chuan zirlaite leh hna zawng mekte'n sawrkar department, private company leh sumdawnna hmun hrang hrangte an hmelhriatna leh an kawng kawhhmuhtu a ni dawn tih a sawi a. Zirlaite leh kal khawmte'n Job Fair & Career Fair chu chhawr ṭangkai tum ṭheuh tura chahin, zirlaite'n an theihna leh an tui zawng tak an hriat chhuah a, chumi mil zela eizawnna kawng an thlan thiam theih nan zirtirtute pawhin kawng kawhhmuh a, kaihruai ṭhin turin a chah bawk.

LESDE Job Fair & Career Fair hawnna hun hi GJBC-a Assistant Professor Dr Judy Lalparmawii Khiangte chuan a kaihruai a. GJBC Vice Principal Pu Lalrotluanga'n inlawmna thu sawiin, Lunglei District Labour, Employment & Skill Development Officer (DLEO) Pu Lalbiakmuana Hauhnar chuan report a pe a. LESDE aṭangin Pi Zahenthangpuii'n lawm thu sawiin, Bawrhsap leh official-te chuan hna thawk ruaitu agency hrang hrangte buk (stall) an tlawh kual nghal.

LESDE Job Fair-ah hian hna thawk ruaitu pawl/sumdawng hrang hrangte telin, stall 27 siam a ni a. He'ng sector: Financial Institution, Banking, Healthcare, Service, Automobile, IT, FMCE, Tourism & Hospitality, Beauty & Wellness, etc. hnuaia company hrang hrang inpho chhuakin, Mizo ṭhalai hna zawng laite tan hna thawh tur an chhawp chhuak a. Ṭhalai hna hmu nghalte an awm bakah, employer-te hnena inziak lut, interview leh document endik hmabak (follow up tur) mi ṭhahnem tak an awm bawk a. Zirna leh eizawnna kawng inkawhhmuhna (career guidance leh counselling) buatsaih ni bawkin, zirlai leh hna zawng lai ṭhahnem takin an pan bawk.

LESDE Department hi Mizoram sawrkar hnuaia ṭhalaite tha tihchakna (youth empowerment) lama hma latu a ni a. Ṭhalaite eizawnna tlak thiamna pek (skill training) kawnga hma an lak bakah, intihsiakna leh intawh khawmna hrang hrang – Skill Competition, Innovation leh Entrepreneurship Fair leh Competition te an buatsaih ṭhin.

Lunglei DLEO Pu Lalbiakmuana Hauhnar chuan LESDE Job Fair buatsaih chhan ber chu ṭhalai hna zawng mekte leh hna thawk ruaitute awlsam zawka an intawh khawm theihna tur a nih thu sawiin, ṭhalai hna zawng mek leh zirlaite tana kawng kawhhmuh turin Career Guidance leh Counselling chu buatsaih tel a nih thu a sawi a. LESDE Department hnuaia hamṭhatna hrang hrang awmte tar langin, Skill Training – PMKVY, PM Vishwakarma leh Industrial Training Institute Lunglei hnuaiah trade hrang hrang training theih a nih thu a sawi a. In sak leh a kaihhnawiha thawkte tan Mizoram Building & Other Construction Workers Welfare Board (MBOCWWB) hnuaiah inziak lutin, hamṭhatna hrang hrang dawn theih a nih thu sawiin, he'ng hamṭhatnate hre chiang tur hian District Employment Exchange Lunglei-ah office hun chhungin zawh fiah theih reng a nih thu a sawi.