764/2025-2026

Lunglei, 2025 Nikir thla ni 9: June ni 6 khan Lunglei Municipal Council (LMC) Board of Councillors (BoC) chu an Chairman, Pu Lalzuithanga kaihhruaiin BoC Meeting Hall, Convention Centre, Lungleiah an ṭhu khawm.

He ṭhut khawmah hian LMC-in kum 2024-2025 chhunga parking fee a hmuh cheng nuai 18.31 (₹ 18,31,349/-) aṭanga BoC-in hmanna tur a ruahman sa cheng nuai 4.86 (₹ 4,86,275/-) bak hmanna atana LMC Traffic & Transport Co-ordination Committee (TTCC)-in a rawtna chu sawi ho a ni a. Tui luan kawr khuhna ṭha lo siam ṭhatna atan, kawng leh kawng sir kea kalna daidanna pal (railing) rawng hnawihna atan, kawngpui luan chin baka lung phahna atan, kawng kual laia darthalang (convex mirror) dahna atan leh kawng lai cheina leh tilang fiahtu eng (reflector/road stud light) vuahna atan tea hmang tura TTCC rawtna chu vawiina BoC ṭhu khawm hian an pawmpui a. A ṭul ang ruahmanna kalpui turin TTCC kutah dahin, khawpui laili deuh leh a ṭul zual laiah hna thawh hi bul ṭan ṭha an tih thu an tar lang bawk.

BoC chuan The Mizoram Street Vendors (Protection of Livelihood and Street Vending) Regulations, 2017 chu Lunglei Municipal Council huam chhungah hman turin lungrual takin an pawm tlang a. The Lunglei Municipal Council Licensing Regulations, 2024-in a sawi angin LMC huam chhungah sumdawng reng rengin phalna an neih ngei a ngaih thu leh phalna nei lo sumdawn khap a nih thu tar lan niin, raltlante bik chu phalna hian a huam loh thu leh dawr luah leh khawlaia sumdawn nan pawh phalna pek theih an nih loh thu tar lan a ni a. Hemi chungchangah hian tuna dan pawm tak hmang hian fel taka hma lakna kalpui tura rel niin, a ṭul anga lo bawhzui turin LMC Chief Executive Officer (CEO) Pu Donny Lalruatsanga ruat a ni.

He hunah hian Executive Council-in Lunglei Day hman chungchanga rawtna an thlen chu BoC ṭhu khawm chuan NGO hrang hrangte leh Lunglei khawpui chhunga rawn awm deuhte nen zau zawka sawi hona (consultation meeting) buatsaih hmasak phawt ni se, tiin a rel a ni.

LMC Board of Councillors ṭhut khawmah hian elected councillor sawm (10) telin, LMC CEO Pu Donny Lalruatsanga'n a telpui bawk a ni.