1592/2025-2026

Lunglei, 2025 Thlazing ni 8: Nimin khan Lunglei Municipal Council (LMC) Board of Councillors (BoC) chu an Chairman, Pu Lalzuithanga kaihhruaiin Lunglei Convention Centre-a BoC Meeting Hall-ah an ṭhu khawm.

He ṭhut khawmah hian kumin 2025-a Krismas Bazar siam tura BoC-in a lo rel tawh bawhzui dan tur leh hma lak dan tur rel a ni a. Hemi atan hian Task Force Committee din niin, anni hian ruahmanna lo siamin, BoC meeting leh hunah report pe se, tih a ni. 

Kum 2023–2024 Urban Local Body Grant 2nd Installment dawn fel a nih thu tar lan niin, kalpui dan tur sawi ho a ni a. Ward tinah rualkhai taka hma lak dan tur ruahman ni se, tih a ni. 

LMC-in mipuite chhawk zangkhai nan Urban Transport hnuaia khawpui chhunga bus service-tir tura BoC hmasain a lo rel tawh bawhzui dan tur sawi ho a ni a. GIA hmanga hma lak dan ngaihtuahpui turin sawrkarah dilna thlen ni se, Budget-ah telh tura chhawp chhuah ni se, tih a ni a. Bawhzui turin Executive Councillor Pu Zorinsanga Hmar chu ruat a ni. 

BoC-in a lo pawm tawh, The Mizoram Urban Area Building Regulation 2024 chu Lunglei khawpui chhunga mipuite zawh tawka kalpui a nih theih dan tur lo duang tura ruat, Chief Executive Officer Pu Donny Lalruatsanga'n ruahmanna a siam chu thlir ho a ni a. Rawtna hrang hrangte sawi ho niin, siam rem ngai laite CEO-in lo siam ṭha se, BoC meeting leh hunah thlir ho leh ni se, tih a ni. 

Garbage Free City Project kalpui mekah ward pali - Ward number 1, 2, 9 leh 11-ah te hma lak mek a ni a. He'ng hma lakna atan hian BoC chuan ULB Grant Tied Fund, Sanitation and Solid Waste Component aṭangin cheng nuai 40 an pawm.

LMC Ward 4-na Councillor Pu R. Lalramzauva Resolution, ZMC&H pantute tana khualbuk sak chungchang pawh sawi ho a ni a. Dan lam aṭanga thlirin, LMC-in a tih theih thil a nih leh nih loh te zir chian a, sawrkar lamah thlen rel a ni.

Nimina LMC Board of Councillors ṭhut khawmah hian elected councillor 11 tel kimin, LMC CEO Pu Donny Lalruatsanga'n a telpui bawk.