4676/2024-2025

Lunglei, 2025 Vau thla ni 17: Vawiin khan Lunglei Municipal Council (LMC) hnuaia Traffic and Transport Co-ordination Committee (TTCC) chu an Chairman, LMC Vice Chairman Pu K. Lalrinawma hovin BoC Hall, Convention Centre, Lungleiah an ṭhu khawm.

LMC Vice Chairman Pu K. Lalrinawma chuan Lunglei khawpuiah lirthei tlan dan leh hun dan chungchangah mipui tana him leh zangkhai leh khawpui hmel timawi tur zawnga ruahmanna siam chhoh zel a nih thu sawiin, khawpui chhunga lirthei leh mihring veivahnaah ruahmanna ṭha zawk a awm zel theih nan member-te chu ngaihtuahna seng tlang turin a sawm a ni.

He ṭhut khawmah hian LMC Ward VI Councillor Pu R. Lalremsiama leh Chief Executive Officer Pu Donny Lalruatsanga te bakah, member dang - SP Lunglei ai awh, SE PWD ai awh, DIPRO Lunglei, Traffic incharge, District MJA President leh Sub-Headquarters YMA Secretary te an tel a. Lunglei khawpui chhunga parking ruahmanna leh two wheeler taxi stand ruahmanna chungchanga dilna leh rawtna lut te, khawpui chhunga pik-up leh maxi cab stand chungchang te sawi ho a ni a. Dilna leh rawtna hrang hrangte chu LMC leh Police/Traffic lamte nen a hmuna enfiah hnuah ruahmanna siam ni se, tih a ni.