1450/2026-2027

Lunglei, 2026 Vawkhniahzawn thla ni 18: Vawiin khan Lunglei Municipal Council (LMC) hma laknain Lunglei khawpui chhung hmun hrang hrangah India sawrkarin bawlhhlawh thliar hran dan thar a ruahman chu mipui an hmelhriatna turin kawtthlera inzirtirna (street demonstration) buatsaih a ni.

Solid Waste Management Rules, 2026 hnuaiah bawlhhlawh thliar hran dan thar hi ruahman niin, Supreme Court pawhin he bawlhhlawh thliar hran dan (Four-stream Segregation of Waste) hi khauh taka kalpui turin thupek a lo chhuah tawh a. Mizoram sawrkar pawhin a ngai pawimawhin, Lunglei khawpui chhungah pawh LMC ruahmannain bawlhhlawh hmun li-a thliar hran hi kalpui thuai ngei a ṭul dawn a. Hemi atana inpuahchahna turin inzirtirna hi buatsaih niin, mipuite hnenah bawlhhlawh chi li-a thliar hran dan inzirtirna bookmark sem tel a ni bawk.

Bawlhhlawh thliar hran dan hrang hrangte chu:  

1. Dry Waste: Bawlhhlawh ro kan tih mai hi bawlhhlawh ṭawih thei lo kan tih ṭhin – plastic bottle te, polythene/plastic bag te, hman khat daih plastic chi hrang hrang ang chi hi a ni a. He'ng hi bawlhhlawh bawmah a hrana khung tur a ni.

2. Wet Waste: Bawlhhlawh ṭawih thei, he'ng – chawhmeh velna kawr te, thlai kawr (entir nan: vaimim kawr) te, chaw leh chawhmeh nawi ang chi te hi a ni a. He'ng hi a hrana khung leh tur a ni.

3. Sanitary Waste: Mihring taksa aṭanga chhuak zun leh ek bakah, thisen leh thlan chhuak sawngbawlna atana hman (entir nan: diaper, pad, lapua, wipes leh a dangte hman tawh hnu) ang chi hi a ni a. He'ng bawlhlawhte hi lehkha/chanchinbu chhiaa funin, a paihna tur bika siam bawlhhlawh bawm hranah paih tur a ni.

4. Special Care Waste: Damdawi leh Chemical kaihhnawih bawlhhlawh (entir nan: battery chhia, syringe, medical glove, plaster, damdawi chhia/expired tawh leh a dangte) ang chi hi a ni a. He'ngte hi uluk taka thliar hrangin, bawlhhlawh bawm ruahman bikah paih tur a ni.

Bawlhhlawh thliar hran dan thar hi Lunglei khawpui chhungah la kalpui thuai tur a nih avangin a taka lo inzir ṭan turin Lunglei Municipal Council thuneitute chuan Lunglei mipuite an ngen.