1399/2024-2025

2024 Vawkhniahzawn thla ni 31: Vawiin khan Lunglei Municipal Council (LMC) huam chhunga bial (ward) hrang hrangte faina kawnga inelna buatsaih mek, LMC Award, 2024  atana endik thawh khatna chu Panel of Judges Convener, LMC Secretary Pu Lalrinawma hovin kalpui a ni.

Ward fai endiknaah hian LC Association, MJA Lunglei District, Sub-Headquarters YMA leh  Sub-Headquarters MHIP hruaitute an tel a. Vawiin hian Ward No. 1 hnuaia Pukpui leh Zotlang leh Ward No. 3 hnuaia Bazarveng leh College Veng te endik an ni a. Ward hrang hrang hnuaia veng hrang hrangte pawh la endik chhoh zel tur a ni.

LMC Award 2024 atana fai intihsiakna hi July ni 1, 2024 aṭang khan kalpui ṭan niin, kum tluana inelna tur a ni a. Hemi pual hian LMC huam chhunga ward tin hnuaia veng hrang hrangte chuan veng chhung faina kawngah hma an la chho mek a. Faina kawnga hma lakna tehfung hrang hrang hmangin veng fai endikna hi kalpui tur niin, January 2025-ah result puan a, lawmman sem theih beisei a ni.

Ward fai inelna, LMC Award 2024-ah hian Ward fai ber (pakhatna)-in ₹ nuai 3 leh trophy, pahnihnain ₹ nuai 2 leh trophy, pathumnain ₹ nuai 1 leh trophy an dawng ang a. Ward pakhat hnenah consolation prize ₹ sing 3 leh citation hlan a ni bawk ang.