1673/2025-2026

Lunglei, 2025 Khuangchawi thla ni 1 : Lunglei Municipal Council (LMC) ruahmannaa 'Lunglei Ni' hman tur atana Organising Committee chu nimin khan Lunglei Convention Centre-a LMC BoC Meeting Hall-ah a ṭum thum nan an ṭhu khawm.

Organising Committee ṭhut khawm hi Chairman, LMC Chief Executive Officer (CEO) Pu Malsawmtluanga'n a kaihruai a. Co-chairman, Lunglei Sub-Headquarters YMA President Pu K. Lalfakzuala leh Secretary, Sub-Headquarters YMA Secretary Pu Zothanzuala Hnamte te bakah, member-te — sawrkar official, pawl hrang hrang ai awh leh Lunglei mi challangte an tel.

Lunglei Ni buatsaih tura mawhphurhna hrang hranga hma la tur committee peng 10 ruata hruaitute hnen aṭangin hma lakna tur leh hmachhawp an ruahman dan report ngaithlak niin, an hma lakna tur chhawp chhuahte sawi ho a ni a. Committee pengte'n member tur an ruat belhte pawm a nih bakah, an ruahmanna chhawp chhuah leh Organising Committee-a rawtna luh belhte nen sawi ho niin, siam ṭhat ngaite siam ṭhat a nih hnuah pawm a ni bawk.

Lunglei din ni tichiang tura document hrang hrang la khawm tura ruat Pu Chawngchhuana Chongthu chuan Supreme Court Advocate on Record, Pu JC Lalnunsanga'n National Archives of India, New Delhi aṭanga British sawrkar document hrang hrang tlawmngaia a dil chhuahte leh a sawi fiahnate Committee hmaah a pharh a. Ziaktu dang thu ziak leh zir chianna te nen sawi ho niin, report hrang hrangte chu member-te'n lo zir chiangin, ṭhut khawm leh hunah Lunglei din ni chu tihchian tum ni se, tih a ni.

He ṭhut khawmah hian Lunglei Ni puala logo insiamsiak buatsaih rel ni bawkin, Souvenir Committee lamin hma lo la se, tih a ni.