1618/2026-2027

Lunglei, 2026 Thlazing ni 1: Vawiin khan Lunglei West bialtu MLA Pu T. Lalhlimpuia chuan a bial, Lunglei West huam chhunga tun hnaia Post Graduate exam-a ti ṭha (rank holder)-te hnenah chawimawina leh lawmpuina thilpek hlanin, Tlanglian Academy nen ṭang kawpa Lunglei West bial chhunga ṭhalai hna zawng laite tana online coaching sponsorship kalpui tur a hawng nghal.

Cultural Heritage Centre, Lungleia Zirlai Ti Ṭha Chawimawina leh Online Coaching Sponsorship Hawnna hun buatsaihah Lunglei West bialtu MLA Pu T. Lalhlimpuia chuan tun laiah technology leh thiamnaah khawvel a sang tawhin, zirlaite ban phakah eng kim a awm tawh a, zir tur mahnia inhai kuak theih a tam tawh hle tih sawiin, zirlaite mamawh chu kaihhruaina ṭha a nih thu a sawi a. Kan tuipui leh vei zawng kan mutpui a, kan mut dawna kan thil tih ṭhinin kan hlawhtlin leh hlawhtlin loh a hril thui hle tih sawiin, zirna kawngah leh hna thawhnaah hlawhtlinna tluantling chang thei turin ril ṭamin ei tur a zawng anga thiamna zawng a, zirna chu ṭamchhawl anga anmahni turtu atan hmang turin zirlaite leh ṭhalaite a fuih.

Mizoram sawrkarin hna thar tam tak a lak chhoh mekah a thiam thiam lak ṭhin an nih avangin a thiam leh thawk rim apiang an nihlawh zel dawn tih sawiin, Pu T. Lalhlimpuia chuan an zir laiah thiamna tluantling nei tura theih tawp chhuah turin zirlaite a fuih a. Hmasawnna chu mita hmuh theih thilah chauh teh lovin, ram ei leh bar zawnna kawnga nghawng a neih danah teh a pawimawh thu sawiin, hmasawnna tluantling innghahna chu zirna a nih angin sawrkar ṭha tehnaah pawh zirnaa hmasawnna chu tehfung pawimawh a nih a ṭul thu a sawi.

Pu T. Lalhlimpuia chuan ram dang nena insumdawn tawnna kawngpui KMMTTP leh rel kawng lo lutin hmasawnna leh hna tam tak a rawn luhpui dawn tih sawiin, chhiatpui lova chhawr ṭangkai turin theih tawpa lo inhmakhua leh inbuatsaih a ṭul thu a sawi a. Bungraw chhek khawl leh thiar velna kawngah te, thil siam chhuahna hmun (industry) tihchangtlun kawngah te muangchang lova inbuatsaih leh ṭan lak a ṭul thu sawiin, zirnaa rilṭamte tan hna ṭau a la ṭeh dawn chauh avangin bial mipuite chu zirnaa rilṭam turin a chah a. Hna zawng mekte tana online coaching kalpui tura mi 20 tan dilna hawnah dilna 31 lai a lut chu lawmawm a tih thu leh hnawl bik nei lovin a dil hmasa 31 chu an zavaia lak an nih thu sawiin, hlawhtling ngei turin duhsakna a hlan a. A pawimawh ber chu Pathian hriatna a nih angin, Pathian ṭihna nen zirna leh hna zawn chhunzawm zel turin ṭhalaite a chah.

Zirlai ti ṭha chawimawina leh online coaching sponsorship hawnna hi Tlanglian Academy Ambassador & Miss Mizoram 2020 Zirsangpuii'n kaihruaiin, Rev. Dr F. Lalsangliana (BCM Rahsiveng Pastor Bial) chuan hunserh a hmang a. Hnahthial Sub-Deputy Commissioner Pu Lalhruaitluanga, MCS leh Tlanglian Academy ai awh Dr C. Lalengkima te'n online coaching kalpui dan tur leh zirlaite fuihna thu hrang hrang an sawi a. Lunglei Sub-Divisional Education Officer (South) Pu V. Zoremtluanga, Young Mizo Association (YMA) Sub-Headquarters Lunglei Secretary Pu C. Lalrindika, Mizo Zirlai Pawl (MZP) Headquarters Lunglei President Pu H. Lalhmingmawia leh Mizo Students' Union (MSU) Regional Headquarters Lunglei President Pu Lalthangliana te hnen aṭangin fuihna thu leh lawm thu sawi ngaihthlak a ni bawk a. Tlanglian Academy ai awhin Director Pu David Lalrinchhana'n lawm thu sawiin, Lunglei West ZPM Block-I President Pu C. Thansanga'n lawm thu sawiin hun a khar.

He hunah hian Lunglei Municipal Council (LMC)-a Councillor Pi Zonunmawii bakah, Tlanglian Academy te, sawrkar official-te, pawl hrang hrang ai awhte, political party hruaitute, zirlaite leh an chhungte an kal khawm a. Post Graduate exam-a Lunglei West bial chhung mi top 10-a lang chin mi 10 hnenah lawmpuina thuziak leh laptop hlan a ni a. Lunglei West MLA sponsor-a Tlanglian Academy hnuaia MCS (Combined Competitive) Examination Prelims Online Coaching zawm tur mi 31 te hming puan chhuah niin, MLA Pu T. Lalhlimpuia leh Tlanglian Academy ai awhte nen inchibaina leh thla lak hona hun hman a ni a. Online coaching hi August 2026 aṭangin thla li chhung kalpui phawt tura ruahman a ni.

Vawiina Lunglei West bial chhunga post-graduate zirlai ti ṭha lawmpuina hlante chu:

1. Eliazar Rosangliana, Bazar Veng, Lunglei – Gold Medalist, Master of Science in Disaster Management (MZU)

2. Lalrinawmi, Buarpui,  Lunglei District – Gold Medalist, Master of Science (Geology) (MZU)

3. C. Lalrohlua, Rahsiveng, Lunglei – Gold Medalist, Master of Arts (English) (ICFAI University)

4. C.Vanlalnghaka, Bazar Veng, Lunglei – 2nd Rank, Master of Arts (Geography) (MZU)

5. L. Lalmuanpuii, Sazaikawn, Lunglei – 2nd Rank, Master of Library & Information Science (MLIS) (MZU)

6. Zonunmawii Hmar, Rahsiveng, Lunglei – 4th Rank, Master of Arts (Economics) (MZU)

7. C. Zirnuntluangi, Venglai, Lunglei – 5th Rank, Master of Social Work (MSW) (MZU)

8. Lalṭhakima Punte, Rahsiveng, Lunglei – 7th Rank, Master of Arts (Economics) (MZU)

9. Ruth Lalramengmawii, Bazar Veng, Lunglei – 7th Rank, Master of Social Work (MSW) (MZU)

10. V. Vandingpuii, Bazar Veng, Lunglei – 9th Rank, Master of Arts (Political Science) (MZU)