N0.580/2020-2021

COVID-19 chungchanga hmalakna leh dinhmunte zirchiang tura Mizoram sawrkarin a din Covid-19 Medical Operational Team, Dr. ZR Thiamsanga, MLA, Vice Chairman, Health & Family Welfare Board kaihhruai chuan vawiin khan Lunglei rawn thlengin chawhnu dar 2 khan Lunglei DC Conference Hall-ah Lunglei District Level Task Force on Covid-19 te meeting an neihpui.

Meeting-ah hian Lunglei HPC Vice Chairman Pu Lawmawma Tochhawng, Lunglei DC Pu V. Lalsangliana, SP Pu C.Lalthanmawia, CMO Dr Thani Pachuau leh medical hnathawktute leh DLTF member-te an tel a ni

Covid-19 Medical Operational Team Chairman Dr. ZR Thiamsanga chuan khawvel pum tibuai mektu Covid-19 hripui beih let kawngah Sawrkarin  theihtawpa hma a lak zel thu sawiin Medical lam hnathawktute, Police, Village Level Task Force-te,  phal taka tanpuina thawhtu mimal, pawl, Kohhran  bakah  PPE, mask leh sanitizer siamtu mi thahnemngai tak takte chu chhuanawm a tih thu a sawi a. Sawrkar tha tichak tura mawhphurhna chelhtu hrang hrang District Level Task Force on Covid-19, Village Level Task Force, NGO, VC leh Media-te thahnemngaihna leh inpekna avangin an chungah lawmthu a sawi bawk.

COVID-19 do chungchangah Chief Minister Pu Zoramthanga leh H&FW Minister Dr R. Lalthangliana te kaihhruaina hnuaiah Mizoram chu India ram State te zingah inbuatsaih hmasa ber leh hmahruaitu te zinga mi  kan nih thu tarlangin lockdown pawh Central aia ni thum (3) a hmaa puangin Domestic Flight phei chu a khar hmasa ber kan nih thu a sawi a. Hrileng ven hna chu Health Department mal chauh tih theih anilo a, kan zavaia kan thawhho chhunzawm zel a tul a ni tiin Mizoramin healthcare facilities kan neih that tawkloh avangin invenna lamah theihtawp kan chhuah chhunzawm zel a tul a ni, a ti bawk.

Hmanraw mamawhte pawh chah thlen teuh tawh niin, mamawh angte ngaihtuah zel niin tun dinhmunah invenna hmanrua stock awmzat chu PPE  - 2621, PPE Mizorama siam -  546, N-95 Mask - 22,746, 3 layer mask – 1490, Glove – 19,450 leh Mask Mizorama siam- 7845  anih thu kalkhawmte a hrilh.

He hunah hian Lunglei HPC Vice Chairman Pu Lawmawma Tochhawng pawhin thu sawiin Task Force, VLTF-te leh Damdawiin te inpuahchahna felfai tak chu fakin, hrileng mekin engtik thleng nge a awh dawn a hriat lohva, kan hnaivai maia awm State leh ram dangah te a pung zel a, kan fimkhur lehzual a tul takzet a ni, a ti a. Lunglei District huamchhunga Bangaldesh ramri hrula khuate tun karah khan a tlawh thu sawiin HPC Vice Chairman chuan helai border vengtu BSF-te nen khaw engemawzat tlawhin border venhim hna fimkhur leh uluk zawka an kalpui theihna tura ruahmanna a siampui thu a tarlang bawk.

He hunah hian Lunglei SP Pu C. Lalthanmawia, CMO Dr Thani Pachuau, Additional DC Pu R. Vanrengpuia ten hmalakna tlangpui report an pe a. Lunglei District pumpuiah COVID-19 Police duty deploy zat chu mi 211 niin Dan leh thupek kenkawh kawngah harsatna lian tham a awm lova. IPC Section 188, Disaster Management Act Section 51 leh 58 –te behchhanin District pumah mi panga (5) man an ni tawh. VLTF duty tluang taka kalpui mek niin Lunglei District-ah hian VLTF 129 awmin hengte hi Village Council 113 leh Sub Village 16 an ni.

COVID-19 laka lo invenlawkna turin H&FW Department hmalaknain 10th February, 2020 atang khan Kawrpuichhuah-ah ‘Coronavirus Screening Point’ siam tan niin Medical Team-te nitin an duty thin a. 2nd March, 2020-ah khan Missionary Kai leh Licheng Kai ah te ‘Coronavirus Screening Point’ hi neih belh niin 20th March, 2020 thleng khan screening hi kalpui a ni a, screening kalpui chhung hian COVID-19 vei rinhlelh an awmlo a ni.  Mahni ina inkhunghrang (Home Quarantine) mi 729 ten Quarantine period zo fel tawhin tun dinhmunah Lunglei District-in Home Quarantine kan nei tawhlo a. Facility Quarantine-ah mi 18-in Quarantine period zo tawhin la quarantine mek mi pakhat Tlabung-ah ala awm a, hei hi District pumah Quarantine mek awmchhun a ni.  

Medical Operational Team hi COVID-19 chungchanga hmalakna leh dinhmunte zirchiang tur leh a tul anga thurawn pe turin March 24^th, 2020 khan Mizoram sawrkarin a din a, team nga (5) ah inthenin Mizoram khaw hrang hrang, a bik takin ramri hrula khuate an tlawhchhuak mek a, khua an tlawh chhung hian District lama thuneitute, damdawi lama thawkte, VLTF leh YMA te nen inkawmna hun an nei a. Heng hmun pawimawh bik leh ramri dep an tlawh turah hian zirtirna leh training pawh a tul angin an neihpui nghal zel dawn bakah a remchan dan angin COVID-19 dona kawnga hmanraw tul leh mamawh te pawh an pe nghal bawk ang.