1937/2025-2026

Lunglei, 2025 Khuangchawi thla ni 16: Vawiin khan Lunglei District-a hma sawnna hna thawh hrang hrang huap zo, rualkhai leh awmze nei zawka kalpui a nih theih nana hma la tura din District Planning Committee (DPC) chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm.

He ṭhut khawmah hian Mizoram sawrkar Planning & Programme Implementation (P&PI) Department hnuaia Mizorama district hrang hrang hmasawnna atana ruahmanna thar, "Mizoram District Transformation Programme" (MDTP) kalpui dan tur sawi ho a ni a. Chairman Pi Navneet Mann chuan MDTP chu kum 2047-a "Viksit Bharat" hmathlir tihpuitlinna tur leh Mizorama district hrang hrangte district hmasawna din chhuahna tura ruahman a nih thu sawiin, Lunglei District-ah MDTP chu ṭangkai taka hman a, tihhlawhtlin leh tihpuitlin a nih ngei theih nan department hrang hrangte chu ṭhahnem ngai taka hma la turin a chah.

MDTP kalpui turah hian district hrang hrang chuan September ni 19, 2025 aṭanga thla thum chhungin an district dinhmun zir chianna, "District Baseline Profile" (DBP) leh district chhung hmasawnna tur hmathlir, "District Transformation Vision" (DTV) duangin, chumi mil chuan sawrkar laipui leh State sawrkar kal tlanga hmasawnna hna thawh tur hrang hrang chu kalpui ṭhin a ni tawh dawn a. Scheme awm sain a huam chin baka hma lakna tur ṭul leh pawimawh kalpuina turin DPC-in kum tin "District Catalytic Intervention Plan" (DCIP) duangin, hmasawnna hna hrang hrang kalpui a ni dawn bawk a. DCIP kal tlanga hmasawnna hna thawhna tur hian kum 2025-2026 atan sawrkar chuan district 11 tan District Catalytic Fund (DCF) cheng vaibelchhe khat ṭheuh ruahmanin, hna an thawh ṭhat dan azir leh ruahmanna an neih ṭhat dan azirin kum thar aṭang chuan sum ruahmanna hi siam a ni tawh dawn a. DCIP hnuaia hna thawh turah hian scheme dangin a huam loh te, department dang nen thawh hona ṭha (convergence) awm theihna tur leh khawtlang hmasawnna tur hma lakna thar te chu ngaih pawimawh tura tih a ni.

District Baseline Profile leh District Transformation Vision chu a kalhmang duan sa Annexure 1 leh Annexure 2 angin Lungleia department hrang hrangte'n anmahni chan ṭheuh siamin, a hma lamin DC Office-ah theh luh ni se, tih a ni a. Hei hi Lunglei District DBP leh DTV atan hmun khatah dah khawmin, P&PID-ah thawn a ni ang a. DTV mil hian DCIP pawh ruahman zui a ni ang.