2041/2025-2026

Lunglei, 2025 Mimkut thla ni 9: Vawiin khan Lunglei District Bawrhsap Pi Navneet Mann kaihhruaiin Lunglei DC Conference Hall-ah September ni 12 aṭanga October ni 11, 2025 inkar chhunga Lunglei District-a nu nau pai, nau pawm leh naupangte’n chaw ṭha tlakchham avanga harsatna an tawh ṭhin sut kian a nih theih nana sawrkar laipui hma laknaa beihpui thlak tur, Rashtriya Poshan Maah (National Nutrition Month) 2025 hman dan tur rel a ni.

He hunah hian Women & Child Development (WCD), Health & Family Welfare (H&FW), Rural Development & Administration (RD&A), Environment, Forests & Climate Change (EF&CC),  Agriculture & Farmers Welfare (A&FW), Horticulture leh Information & Public Relations (I&PR) official-te an tel a. Lunglei District Programme Officer (WCD) Pu C. Lalnunfela chuan Rashtriya Poshan Maah 2025 hman dan tur ruahmanna awm sate a tar lang a. Department hrang hrang tih tur leh mawhphurhna intuk niin, hlawhtling taka Poshan Maah hman a nih theih nana thil ṭul hrang hrang sawi ho a ni.

Lunglei District-a Rashtriya Poshan Maah hman tur hi September ni 12, 2025 chawhma dar 11-ah Lunglei DC Conference Hall-ah a hawnna hun hman tum a ni a. Rashtriya Poshan Maah hman chhung (thla 1 chhung) hian Lunglei District-a anganwadi centre (AWC) zawng zawngah chaw ṭha pawimawhna leh nu leh naupangte’n chaw ṭha mamawh khawp an hmuh theih nana thil pawimawh hrang hrang inzirtirna hun hman a ni dawn a. Thau lutukna (obesity) laka inven nana thlum leh mawm insum a pawimawhzia inzirtirna atan, September ni 15–18 chhungin AWC zawng zawngah naupang thau lutuk (obese) zawn chhuah nan taksa inphut dan, BMI (body mass index) endik leh Health ATM-ah nute zinga natna inkai chhawn theih loh (NCD) endik tum a ni a. Chaw ṭha leh zirna pawimawhna inzirtir nan anganwadi worker (AWW) leh pre-school zirtirtute tan training buatsaih leh naupangte nena hun hman te, “Ek Ped Maa Ke Naam” hnuaiah AWC leh WCD Office chhehvela thing rah ei theih chi phun te rel a ni a. Khawtlanga mipate’n chhungkaw enkawl chungchang leh chaw ṭha pawimawhna an hriat thar theih nan AWC awmna  khaw tinah Poshan Maah hman chhung hian vantlang inkhawm (gram sabha) ṭum nga tal buatsaih tum niin, AWW leh SHG (self-help group) te nen ṭang tlangin tual chhuak inkhualtelemna (indigenous toys) insiamsiak buatsaih tum a ni bawk a. AWW-te tan nausen leh naupang chaw ṭha pek dan tur inzirtirna buatsaih tum a nih bakah, chaw ṭha huan (nutri-garden) la awm lohna AWC tinah vertical nutri-garden siam tum a ni bawk.