4414/2025-2026

Lunglei, 2026 Ramtuk thla ni 12: Nimin khan Lunglei District Disaster Management Authority (DDMA) leh National Disaster Response Force (NDRF) ṭang kawpa Lungleia lirnghing avanga chhiatna thlen thulha chet lak dan tur en chhinna (Mock Exercise on Earthquake Disaster) buatsaih tur chungchangah Lunglei DDMA member-te leh a kaihhnawih official-te chu Lunglei DC Conference Hall-ah an ṭhu khawm.

Lunglei DDMA Chief Executive Officer Pi Rochuangkimi Khenglawt chuan ṭhut khawm kaihruaiin, NDRF-in district hrang hrangte mock exercise an neihpui ṭhin chu February thla hian Lungleiah kalpui tura ruahman a nih thu a sawi a. Hemi kaihhnawiha hma lakna tur hrang hrang ruahman leh sawi ho zui a ni.

Lirnghing vanga chhiatna a lo thlen thulha rang taka chhanchhuah hna leh mipuite venhim hna kalpui a nih theih nan leh nunphung pangngai a awm leh thuai theih nana sawrkar kutkete inralrin dan en chhinna leh chuti ang huna chet lak dan tur nunchan zirna atan mock exercise hi February ni 19, 2026 (Ningani) khian Lungleiah buatsaih tura ruahman a ni a. A hmun atan Venglaia Art & Culture building leh kawng chung lei (flyover bridge) bakah, a vela mimal in te a remchan dan anga hman ni se, tih a ni a. Chhanchhuah hna thawk turin NDRF bakah, 2nd MAP SDRF, BSF, Assam Rifles, Sub-Headquarters YMA Quick Response Team leh khawtlang mi tlawmngai (volunteer) te beisei niin, a kaihhnawih department hrang hrang — Police, H&FW, PWD, P&E, PHE, Supply, DTO, I&PR leh MPRO te; Sub-Headquarters YMA, Venglai Local Council leh Branch YMA te phungbawmah sawm ni se, tih a ni a. Relief Centre atan PWD Office Complex leh damdawi in beh chhan atan Civil Hospital Lunglei te ruahman niin, ruahmanna kimchang chu NDRF lam nen inrawnin DC Office aṭangin duan ni se, tih a ni.

He ṭhut khawmah hian kangmei vanga chhiatna thleng palh thei venna atan Lunglei DDMA hmingin Environment, Forests & Climate Change (EF&CC) Department te nen inrawnin ram kang leh kangmei laka fimkhurna thurawn (advisory) chhuah ni se, tih a ni bawk.