514/2025-2026

Lunglei, 2025 Ṭomir thla ni 21: Vawiin khan Lunglei District Bawrhsap Pi Navneet Mann hovin Lunglei DC Conference Hall-ah Bharatmala Pariyojana National Highway 54A & 302 (Hrangchalkawn - Tlabung) kawngpui leh National Highway 54 (Aizawl - Tuipang) kawngpui laih zauh hna leh siam ṭhat hna thawh mek dinhmun leh lirthei tlan dan ruahmanna sawi hovin a kaihhnawih sawrkar official hrang hrangte, kawng enkawltu NHIDCL (National Highways & Infrastructure Development Corporation Limited) leh hna thawktu contractor-te leh Lunglei Maxi Cab Owners Association ai awhte an ṭhu khawm.

He ṭhut khawmah hian 3-Gate - Sazaikawn huam chhunga kawng laih tharna hmuna lung leh lei tla mai thei hmun hrang hranga awmte chu a rang thei ang bera enfiah tur leh chhiatna a thlen palh lohna tura hai fai turin contractor-te chu hriattir an ni a. Leivung paih avanga harsatna thleng mekte chu contractor-te'n leivung dawlna tur an siam loh avang leh leivung paihna hmun tura an paih loh avang nia ngaih niin, hei hi khauh lehzuala en zui tum a ni a, leivung paihna tur hmun dik takah a dawlna tur ṭha taka siamna hmunah chauh leivung paih turin kawng laitute chu hriattir nawn leh an ni.

Ṭawipui North-II khaw bula lirthei chetsual fona hmun chu NHIDCL lamin an enfiah tawh thu leh kawng siam danah fel lo a awm loh thu an tar lang a. Hei hi DC Office, PWD, MVI, NHIDCL leh NGO te nen a hma lamin a hmunah enfiahin, a ṭul anga hma lak zui ni se, tih a ni.

NH-54 (Aizawl - Tuipang) leh NH-302 (Lunglei - Tlabung) kawng laih mek dinhmun thlir ho niin, kawng laitute'n harsatna an tawhte an tar lan bakah, ram neitute aṭanga harsatna awmte thlir ho a ni bawk a. Kawng laitute chu fur lo thleng tur atan harsatna leh chhiatna a thlen loh nan ṭha taka inbuatsaih tura hriattir an ni a, harsatna an neihte chu thuneitute hnenah thlen vat ṭhin tura tih an ni.

He hunah hian kawng siamtute chuan tun dinhmuna an hna thawh dan leh hna thawh dan tur hmachhawp an neihte tar langin, Lungsen leh Tlabung inkar kawng laih hna 90% leh Sazaikawn leh Lungsen inkar kawng laih hna 70% thawh zawh a nih tawh thu an sawi.

Attachment

  • Loading attachment...