1605/2026-2027

Lunglei, 2026 Vawkhniahzawn thla ni 31: Vawiin khan Lunglei DC Conference Hall-ah Lunglei District leh Lungsen Aspirational Block-a sawrkar official-te tan NITI TARA (Toolkit for Analysis, Review & Action) khawl hman dan zir hona, 'Orientation and Capacity Building Programme' buatsaih a ni a. Deputy Commissioner Office, Rural Development & Administration, Health & Family Welfare, School Education, Agriculture, Women & Child Development leh department hrang hrang aṭangin official-te an tel.

He hun hi Lunglei Sub-Deputy Commissioner Pi Lalnunchhani Hnamte chuan a kaihruai a. Sawrkar hnathawh kawngah technology pawimawhzia sawiin, ruahmanna siam aṭanga hmasawnna hna thawhna leh a vil zuina thlengin a ṭangkai hle tih a sawi a. Officer-te chu Lunglei District leh Lungsen Aspirational Block-a sawrkar hma lakna hrang hrang kalpuina leh thutlukna dik siam theih nan NITI TARA platform chu ṭangkai taka hmang turin a chah. 

EdCIL (India) Ltd-a Consultant Pu Sourav K. Banik chuan NITI TARA khawl leh platform hman dan te, data zir chianna leh hma lakna endik nana NITI TARA hman dan turte chipchiar takin a zirtir a. NITI TARA khawl hman dan hi kal khawmte'n a taka khawih chhinin, zawhna leh chhanna leh sawi hona hun hman a ni bawk.

NITI TARA (Toolkit for Analysis, Review & Action) khawl hi NITI Aayog-in a siam, leklam leh ken sawn awlsam, District leh block level thlenga data rinchhana ruahmanna leh thutlukna dik tak siam a nih theih nana hman theih tura duan a ni a. NITI Aayog aṭangin Lunglei District leh Lungsen Aspirational Block-a hman atan NITI TARA khawl hi pakhat ve ve dawn a ni tawh tih vawiin training-ah hian tar lan a ni.