District Agriculture Department buatsaih  ni khat awh tur Paramparagat Krishi Vikas Yojana (PKVY)  Organic  Fair chu vawiin chawhma khan District Industries Training Hall ah Pu H.Lalthansanga  Lunglei District MJA President in a hawng.

Fair hawnna inkhawm tawi neih hi Pu Tlangtimawia District  Agriculture Officer in a kaihruaia, Fair hawngtu MJA President Pu H.Lalthansanga chuan hetiang ang thil tha tak mai kuthnathawktu te tana chhenfakawm tur Agriculture Department ten an buatsaih thei chu lawmawm a tih thu sawiin, hetiang hun pawimawha Deptt lamin Chanchinbumi te ngaihpawimawhna chang hre taka an sawm ve chu lawm awm a tih thu a sawi. Pu H.Lalthansanga chuan Chemical tello thlai eitam hi mihring hriselna atan thil pawimawh tak a ni a, tunlai ah damdawi chi hrang hrang hmanga enkawl thlai kan ei nasat avangin kan hriselna in a tuar thin a ni, a ti. Hetiang a nih avang hian Chemical tello thlai tharchhuah kawngah nasa zawka tan lak a ngai hle a ni tiin, Agriculture Department ten an buatsaih hengtiang kawnga kuthnathawktu te harchhuahna tur PKVY Organic Fair buatsaih pawh hian kuthnathawktute tan hlawkna thlen ngei se a duh thu a sawi. Hei bakah hian MJA President hian MJA te chuan Sawrkar Department tute pawh thawhpui a inhuam thu leh an thu leh hla te pawh puanzar sak ngai apiang puangzar tura an inpeih reng thu a sawi bawk.

DAO Pu Tlangtimawia chuan Mizo ten kan tihdan thin kalsan silo a, Changpat Leitha leh kan siamchawp leitha te hmanga thlai chin dan inhrilh hriatna atan leh Chemical tello a, kan thlai te tha zawka enkawlna kawngah kan thangharh theih nan PKVY Organic Fair hi buatsaih kan ni a ti. Vawiina PKVY Organic Fair siamah hian Lunglei khawpui chhung leh khawpui pawn atang ten Stall 14 hawn a ni a, hengah te hian Chemical tello a enkawl Thlai chi hrang hrang leh Pangpar bakah Organic lei tha te phochhuah niin, man tlawm zawka hralh an ni.