2632/2024-2025

2024 Khuangchawi thla ni 21: Vawiin kha India ram puma ram leh hnam tana nun hlantu police martarte hriat rengna ni atana kum tina hman ṭhin, 'Police Commemoration Day' a ni a. Lungleiah chuan tukin zingkar khan Deputy Inspector General of Police (Southern Range) Pu C. Lalthanmawia hovin 2nd Bn MAP hmunah he ni pual hian hun hman a ni.

2nd Bn MAP complex, Luangmual, Lungleia Police Commemoration Day hmannaah hian DIG (SR) leh a staff-te, SP Lunglei leh a staff-te leh 2nd Bn MAP staff-te an tel a. September ni 1, 2023 leh August ni 31, 2024 inkara an duty laia nunna chan police-te sunna hun hmangin, anmahni zahna chibai an buk a ni.

He hunah hian DIG (SR) Pu C. Lalthanmawia chuan hun hman chhan sawi fiahin, state hrang hranga martar awm zat a puang a. Martarte zahna lantir nan shok parade neih niin, ram tana nun pete hriat rengna lungphun, 'Martyr Memorial'-ah zahna pangpar dah a ni bawk.

Kum 2023 September - 2024 August (kum khat) chhung hian India ram pumah an duty laia nunna chan police mi 214 an awm a. Chu'ng zingah chuan a force malah CRPF mi nunna chan tam berin, mi 23 nunna chan an awm a. Madhya Pradesh chu nunna chan tamna ber state niin, mi 23-in nunna an chan a. Vanneihthlak takin Mizoramah erawh duty laia nunna chan an awm lo.

Police Commemoration Day hi kum 1959 October ni 21-a Ladakh Hot Springs hmuna China sipai kuta martar police 10 te hriat reng nan leh police martarte zahna chibai buk nan kum 1960 aṭang khan kum tin October ni 21-ah hman ṭhin a ni.

Attachment

  • Loading attachment...