385/2026-2027


Lunglei, 2026 Ṭomir thla ni 5: Vawiin khan Lunglei District Bawrhsap Pi Navneet Mann hovin a hna thawh pindanah Lunglei District Bawrhsap hma lakna, Project BLOOM (Better Living through Outreach, Optimal Maternal & Child Health) kal tlanga Lungsen Aspirational Block huam chhunga nu leh naupang hriselna atana hma lakna kal mek thlir ho niin, 4th Quarter 2025–2026 chhunga 3A (ASHA, Anganwadi Worker leh ANM) thawk ṭha lawmman sem nghal a ni.


Lunglei Sub-Deputy Commissioner Pi Lalnunchhani Hnamte chuan inlawmna thu sawiin, lawmmante hi District Bawrhsap Pi Navneet Mann chuan a dawngtute kutah a hlan a. Bawrhsap chuan thawktute chu an hma laknaah fakin, Project hlawhtlin nan theih tawp chhuah chhunzawm zel turin a chah a. Department leh lawmman dawngtute'n an hma lakna report leh rawtna hrang hrang an neihte an sawi bawk.

Project BLOOM hnuaia hma laknaah Lungsen Aspirational Block hi Health & Wellness Centre pasarih beh chhanin bial (cluster) 7-ah ṭhen a ni a. He'ng cluster-te tan hian 3A report card siam niin, cluster inelna kalpui a ni a. He inelna hian hriselna leh chaw ṭha (health leh nutrition) lam a thlur ber a, tehfung (indicator) hrang hrang hmanga teh niin, thla thum bi (quarter-wise) zelin result leh lawmman pek an ni.


Inelna lawmman hmasa ber hi 3rd Quarter 2025–2026 atan kumin Republic Day khan sem a lo ni tawh a. Vawiin khan 4th Quarter result puan leh niin, he'ngte hi lawmman dawngtu an ni:

I. Damdawi In (Health Centre):
Pakhatna – Putlungasih HWC
Pahnihna – Lungrang South HWC
Pathumna – Rualalung HWC

II. Anganwadi Centre:
Pakhatna – Tuisenchhuah Cluster
(AWC 3 – Bolia 1, Bolia 2 & Tuisenchhuah)
Pahnihna – Lungsen Cluster
(AWC 14 – Lungsen 1, Lungsen 2, Lungsen, Lungsen 4, Lungsen 5, Lungsen 6, Lungsen 7, Lungsen 8, Lungsen 9, Lungsen 10, Lungsen 11, Sihphirtlang, Rolui & Undermanik)
Pathumna – Phairuangkai Cluster
(AWC 5 – Phairuangkai 1, Phairuangkai 2, Phairuangkai 3, Rotlang West 1 & Rotlang West 2)

Lungsen Block chhungah hian Health & Wellness Centre 7 leh Anganwadi Centre 44 a awm a. Project BLOOM-ah hian a hma tawnga thawktu (frontline worker)-ah Health & Wellness Officer leh health worker-te, Anganwadi Worker-te leh ASHA-te hman an ni a. He'ng an hma lakna avang leh Project BLOOM-in a ken tel hma lakna hrang hrang kal tlangin Lungsen Aspirational Block chuan nu nau paite tana hamṭhatna leh naupang kum 6 hnuai lamte hriselna atana hma laknaah nasa takin hma a sawn a ni.

Attachment

  • Loading attachment...