985/2025-2026

Lunglei, 2025 Nikir thla ni 27: Vawiin khan Lunglei District Bawrhsap Pi Navneet Mann hovin a hna thawh pindanah Lunglei District-a vohbikte chawi kanna tur hma lakna, Project LEAP (Lunglei’s Empowerment for Access and Equity for all Persons) hnuaia hma lakna kal mek leh hmachhawpte sawi ho a ni.

He ṭhut khawmah hian DC Office-a officer-te, Civil Hospital Lunglei Sr Medical Superintendent leh DSWO Lunglei te an tel a. Project LEAP hma lakna hnuaiah nimin, June ni 26, 2025 khan Lunglei District chhunga vohbik leh upa kum 60 chung lam mi 741 te hnena ALIMCO (Artificial Limbs Manufacturing Corporation of India) aṭanga ṭanpuina hmanrua (assistive device) chi hrang hrang 3,448 sem chhuahna hun buatsaih a nih thu tar lan niin, he hma lakna lawmawm tak hi District mipui tam zawkin an chhawr theih nan hma lak zel ni se, tih a ni a. Hmun hrang hrang pali - Civil Hospital Lunglei, Haulawng, Lunglei Home TNT leh Ṭawipui South-a vohbikte leh upate hriselna dinhmun endikna (health assessment camp) buatsaih tawh dan thlir ho ni bawkin, hmachhawp la awmte kalpui dan tur ruahman a ni bawk.

Lungsen RD Block leh Tlabung RD Block-ahte July ni 10-12 chhungin health assessment camp hi buatsaih leh ni se, tih a ni a. He'ng health assessment camp-ah hian Project LEAP aṭangin vohbikte dinhmun endik te, UDID leh certificate dang (Aadhaar/Voter ID/tribal certificate, etc.) an mamawh siamsak leh ALIMCO aṭanga ṭanpuina hmanrua dilsak te bakah, Healthy Lunglei District Campaign nen kai kawpa natna inkai chhawn theih loh (non-communicable disease - NCD) endikna te kalpui leh tum a ni.