1881/2025-2026

Lunglei, 2025 Khuangchawi thla ni 13: Vawiin khan Lunglei District Level Committee on Myanmar & Bangladesh Refugees chu District Bawrhsap Pi Navneet Mann hovin Lunglei DC Conference Hall-ah an ṭhu khawm a. Lunglei District-a Myanmar leh Bangladesh aṭanga raltlante khawl hmanga an nihna finfiah theihna tura chhinchhiahna, 'Biometric Enrollment' kalpui mek dan an thlir ho.

He hunah hian sawrkar official-te leh Lunglei Local Council Association ai awh te an tel a. Lunglei Sub-Deputy Commissioner Pi Lalhlimpuii Pachuau chuan biometric enrollment kalpui mek report a tar lang a. Hma lak zel dan tur sawi ho a ni.

Refugee biometric enrollment hi Lunglei District-ah July ni 30, 2025 khan kalpui ṭan niin, Lunglei Ramthar refugee camp-ah bul ṭan a ni a. Lunglei District-a raltlan awmna camp leh veng 27 zinga camp 8-ah zawh fel tawh niin, vawiin aṭang khan Lunglei Municipal Council (LMC) huam chhunga veng hrang hrangah kalpui chhunzawm a ni a. LMC huam chhungah hian November ni 3-ah zawh fel hman beisei niin, hemi hnu hian khawpui pawn lamah kalpui chhunzawm a ni ang.

Biometric enrollment kalpui mekah hian internet chak loh deuh changa khaihlak zeuh tih loh chu harsatna lian tham lutuk a awm rih lo va. Khawmawi khuaah chuan internet duhthusama a ṭhat theih rih loh avangin tun dinhmunah biometric enrollment hi kalpui theih a ni rih lo tih tar lan niin, hmun dang tuam chhuah hnuah kalpui tum ni se, tih a ni.

Lunglei District chhungah raltlan awm khawmna camp pakua (9) - Haulawng (Saichhoh), Hauruang, Khawmawi, Mualṭhuam North, Phairuangkai, Pukpui, Ramthar, Ṭhaizawl leh Vanhne-ah te awmin, camp pawn lamah khaw 18-ah mahnia in luah leh mi ina mikhual eng emaw zat an awm bawk a. Myanmar Refugee Registration System (MRRS) portal-a chhinchhiah danin, tun dinhmunah Lunglei District-ah raltlan 1,988 awm mek anga chhinchhiah a ni a. Biometric enrollment tihna aṭangin Foreigners Identification Portal (FIP)-ah mi 788 chhinchhiah tawh a ni.