DIRECTORATE OF INFORMATION & PUBLIC RELATIONS, Government of Mizoram, India

4152/2024-2025

Lunglei, 2025 Ramtuk thla ni 10: Vawiin khan Lunglei District pum puiah kum 2025 atana rulhut hlo pek runpui thawh khatna, National Deworming Day (NDD) 2025 February round buatsaih a ni a. Govt High School, Rahsiveng, Lungleia he ni puala a hawnna hun buatsaih chu Lunglei District Bawrhsap Pi Navneet Mann chuan khuallian niin a hmanpui a, zirlai naupang thlan chhuahte hnenah rulhut hlo (Tablet Albendazole) a eitir a ni.

NDD 2025 February round hawnnaah hian khuallian Pi Navneet Mann chuan National Deworming Day chu India ram pumah hman a nih thu leh a tum ber chu naupang kum 1- 19 inkarte rulhut laka ven a nih thu a sawi a. Ram hmasawn zelah hriselna kawnga hma laknate ngaih pawimawh deuh deuh a nih thu sawiin, rulhut pai lo turin tih theih awlsam tak - kut sil fai ṭhat, thlai leh thei ei tur sil fai ṭhat, tui thianghlim chauh in, ek in ṭha leh thianghlim hman, ei leh in ṭha taka vawn te a pawimawh a ni, a ti a. Rulhut laka fihlim district ni turin naupangte chu rulhut hlo ei ṭheuh tura chahin, rulhut laka fihlim turin Health & Family Welfare Department kutah chauh dah lo va, department hrang hrang leh tlawmngai pawlte thawh hona nena hma lak a pawimawh a ni, a ti.

He hun hi Lunglei Child Development Project Officer Pi R. Lalhmingliani'n a kaihruai a. Lunglei District Deputy Chief Medical Officer Dr Lalrinthangi chuan mihring tana rulhut ṭhat lohzia leh rulhut hlo ei a pawimawhzia sawiin, rulhut paite chu an hrisel theih loh thu leh an ṭhan ṭhat theih loh thu te, zirna lamah pawh an hnufual bik ṭhin thu te a sawi a. Ran vulh leh thlai leh thei ei aṭang te'n rulhut pai theih a nih avangin thil ei dawnin fai taka kut sil ṭhin a pawimawh thu sawiin, sa leh thlai fai taka sil ṭhin a pawimawh thu te, hmun bawlhhlawhah ke lawnga kal loh tur a nih thu te leh in leh a vel vawn thianghlim a ngaih thu te a sawi bawk.

National Deworming Day-ah hian naupang kum 1 - 19 te hnenah rulhut hlo, Tab. Albendazole pek ṭhin a ni a. Lunglei District chhunga sawrkar sikul, mimal sikul leh anganwadi centre-ah te rulhut hlo hi pek vek tum niin, Lunglei leh Hnahthial District chhungah kum 1 - 19 inkar rulhut hlo pek tur target 55,523 an awm a. Vawiin khan District chhunga school, college leh anganwadi centre-ah rulhut hlo hi pek niin, school kai lote chu ASHA-te'n an inah kal chilhin an pe bawk a. Target zinga tel si, vawiina pek hman lohte tan February ni 17 khian thual nawn ni, mop up day buatsaih a ni ang.

Attachment