2105/2026-2027

Lunglei, 2026 Mimkut thla ni 7: Election Commission of India (ECI) bul tuma uluk zawka electoral roll siam ṭhat runpui, Special Intensive Revision (SIR) of Electoral Rolls, 2026 kalpui zawh taka Lunglei District-a Assembly Constituency (AC) paruka vote neite hming chuanna, Final Electoral Roll chu vawiin khan Lunglei District Election Officer (DEO) Pi Navneet Mann chuan Lunglei DC Conference Hall-ah a tlangzarh a. Final electoral roll hi political party ai awhte leh tlawmngai pawlte kutah a hlan nghal.

Lunglei DEO Pi Navneet Mann chuan SIR chu vote nei thei dik takte Electoral Roll-a thun an nih theih nan leh vote nei thei lote paih an nih theihna tura kalpui a nih thu sawiin, tluang taka zawh fel a ni chu lawmawm a tih thu a sawi. Hlawhtling taka SIR kalpui a nih theih nan leh a hun taka final electoral roll tlangzarh a nih theih nana tha thawhtu – Electoral Registration Officer (ERO), Assistant Electoral Registration Officer (AERO), Election Branch, Booth Level Officer (BLO & Asst BLO), Supervisor, Booth Level Assistant (BLA), Village/Local Council (VC/LC), political party, tlawmngai pawl (YMA, YCA, MHIP, MUP, adt.), thu thar theh darhtute leh mipuite chungah lawm thu a sawi a. Khua leh tui vote nei theite chu electoral roll-a an hming a chuan leh chuan loh endik ṭheuh tura chahin, final electoral roll chungchanga sawi duh leh hriat chian duh nei tan District Election Officer hnenah thlen theih a nih thu a sawi bawk.

SIR 2026 final electoral roll tlangzarhnaah hian Election official-te, ERO leh AERO-te, DIPRO/DMNO, political party hrang hrang, tlawmngai pawl hrang hrang leh MJA hruaitute an tel a. Election Officer Pi Lalhruaitluangi chuan SIR kalpui chhunga Lunglei District-a hma lakna leh final electoral roll dinhmun tlangpui a tar lang a. Best BLO Award sem niin, ERO/AERO-te, tlawmngai pawl leh political party ai awhte'n thu an sawi a. Deputy District Election Officer Pi Zoramdini'n lawm thu sawiin hun a khar.

SIR 2026 final electoral roll tlangzarh takah hian Lunglei District chhunga assembly constituency parukah vote nei mi 97,172 (mipa 48,206 leh hmeichhia 48,966) awmin, Lunglei District aṭanga sipaia ṭang service voter-a inziak lut mi 479 an awm bawk a. 30-Lunglei North-ah voter 17,806 (mipa 8,623 leh hmeichhia 9,183) leh service voter 75; 31-Lunglei East-ah voter 15,669 (mipa 7,391 leh hmeichhia 8,278) leh service voter 70; 32-Lunglei West-ah voter 15,404 (mipa 7,303 leh hmeichhia 8,101) leh service voter 65; 33-Lunglei South-ah voter 18,886 (mipa 9,242 leh hmeichhia 9,644) leh service voter 123; 34-Thorangah voter 14,730 (mipa 7,704 leh hmeichhia 7,026) leh service voter 32; 35-West Tuipuiah voter 14,677 (mipa 7,943 leh hmeichhia 6,734) leh service voter 114 an awm.

SIR 2026 kalpui chhunga Lunglei District-a Best BLO-a thlante chu:

30-Lunglei North – Pu C. Zohmingliana, 30/4-Chhipphir

31-Lunglei East – Pu K. Lalremsiama, 31/5-Chanmari-II

32-Lunglei West – Pu Lalbiakdika, 32/16-Venglai-II

33-Lunglei South – Pu C. Lalmalsawma, 33/5-Lunglawn-II

34-Thorang – Pu MC Donald Chakma, 34/1-Mauzam

35-West Tuipui – Pu V. Ramvuanthanga, 35/19-New Khojoysuri

SIR kalpui zawh takah hian Lunglei District-a Draft Electoral Roll-a hming chuang mi 98,808 aṭangin mi 21,552 (no mapping 2,261; mapping with discrepancies 18,441 & others 850) chu ERO leh AERO-te hmaah an nihna finfiah turin hearing tura kohna (notice) pek niin, an zinga mi 3,059 (14.19%) chu final electoral roll-a telh chhunzawm theih an ni lo tih hmuh chhuah a ni a. July ni 4 – August ni 4, 2026 inkar chhunga India khua leh tui kum 18 tling chin, July ni 1, 2008 leh a hma lama piangte tana electoral roll-a inthun thar, inpaih, insawn leh siam ṭhat dilna lutah Form 6 hmanga thun thar 1,739 (mipa 863 leh hmeichhia 876) awmin, hmun dang aṭanga Lunglei District roll-a insawn lut 177 nen, a zavaiin electoral roll-a thun belh voter 1,916 an awm a. SIR Draft Roll-a hming chuang, Form 7 hmanga inpaih dilna lut leh hearing aṭanga paih voter 3,552 an awm bawk a. SIR Draft Electoral Roll aṭangin Final Electoral Roll-ah hian Lunglei District-ah voter 1,636 (1.66%)-in an kiam a ni.