2888/2024-2025
2024 Sahmulphah thla ni 7: Vawiin khan November ni 14, 2024-a Mizoram district khawpui tina tui lian leh lei min avanga chhiatna thlen thulha chet lak dan tur en chhinna (state level mock exercise on floods & landslides) buatsaih tur atana Lunglei District bika hma lak dan tur sawi hovin District Disaster Management Authority (DDMA) member-te leh hemi huna Incident Response System (IRS)-a mawhphurhna nei turte chu Lunglei DC Conference Hall-ah an ṭhu khawm.
Ṭhut khawm hi Lunglei District Additional Deputy Commissioner & DDMA Chief Executive Officer Pu James Miahlung chuan a kaihruai a. Mock exercise buatsaih tur atana National, State leh District DMA aṭanga ruahmanna awm sate tar langin, mawhphurhna hrang hrang neite chu ṭha taka an mawhphurhna hlen chhuah tum turin a chah a ni.
He hunah hian Lunglei DM&R District Organiser Pi Chuaupari Pachuau chuan Lunglei District-a mock exercise buatsaih tur atana inbuatsaih dan tur leh chet lak dan tur hrang hrang chu presentation hmangin a sawi fiah a. Hlawhtling taka mock exercise buatsaih a nih theih nana mihring leh hmanraw ruahman dan tur leh thil pawimawh hrang hrangte sawi ho zui a ni.
Tui lian leh lei min a lo thlen thulha rang taka chhanchhuah hna leh mipuite venhim hna kalpui a nih theih nan leh nunphung pangngai a awm leh thuai theih nana sawrkar kutkete inralrin dan en chhinna leh chuti ang huna chet lak dan tur nunchan zirna, mock exercise hi November ni 14, 2024 (Ningani) khian Mizoram district hmunpui zawng zawngah a rual tlanga buatsaih tura ruahman a ni a. Lunglei District bikah chuan Lunglei khawpui chhungah lei min vanga chhiatna thleng anga nunchan zirna tur hmun pali ruahman chhin niin, chhawmdawlna buk (relief camp) zar nan Convention Centre leh innghahna hmunpui (staging area) atan DC office complex ruahman a ni bawk.
He mock exercise buatsaih tur atana mawhphurhna hrang hrang neite chet lak dan tur inhrilhfiahna leh inzirtirna, table top exercise chu November ni 12, 2024 khian buatsaih turin ruahman a ni.
Attachment
- Loading attachment...
