2864/2022-2023

Lunglei, the 30th November, 2022: Nimin chawhma dar 11:00 khan Conference Hall, Convention Centre, Lungleiah thingtlang khuaa ram neitu ten document felfai zawk an neih theih nan leh, an ram chu din chhuahpui nan an hman theihna tura sawrkar laipuiin scheme a duan, Survey of Villages Abadi And Mapping with Improvised Technology in Village Areas (SVAMITVA)chungchang inzirtirna(IEC) hun hman a ni. He hunah hian LR&S Department atanga lo kal ten Lunglei District chhunga Village Council thlan chhuah 74 aiawhte an zirtir a ni.

IEC on SVAMITVA hi Pu Alan Lalthanzara, Settlement Officer, Lunglei District chuan hawngin, SVAMITVA chu thingtlanga cheng, inhmun/ram neitute fel fai taka chhinchhiahna tura Sawrkar hmalakna a ni tih a sawi a. Peihfel a nih hunah chuan ram neitute mai bakah Village Council leh sawrkar department-a thawkte tan hlei hlei a tangkai dawn hle a ni, a ti. VC ten an khaw map fiah leh dik tak an neih theih dawn avangin, khawtlang hmasawnna hnathawh nan te, sawrkar scheme hrang hrang kalpui dawn te pawhin tangkai takin a hman theih dawn tih a sawi bawk.

Pu C. Lalchhuanmawia, Assistant Director (Survey), LR&S Department pawhin thu sawiin, he scheme hi hma an lo lak hmasakna district ah te chuan Village Council ten Survey of India hnathawkte an lo tawiawm that thu leh Lunglei District-ah pawh hmasawnna rahbi pawimawh tak anih avangin tha taka lo tawiawm zel turin a chah a ni.

Pu Ruatsanga, Consultant, SVAMITVA in powerpoint presentation hmangin SVAMITVA kalpui dan tur a tarlang a. SVAMITVA chungchang inzirtirna (IEC) chu a step hmasa ber niin, hemi zawhah Ground Control Prints lak a ni anga, chuan khaw hrang hrangah te Drone hmangin uluk taka chenna in awmte thla lak a ni ang a, chung thlalak hmang chuan khawchhung map siam a ni dawn tih a tarlang a ni. Map siam zawh hnuah hian a hmuna zirchianna (ground verification) neih leh vek a ni ang a, he hunah hian VC te leh ram neitute nen Gram Sabha neih a ni ang. Ground truthing/verification zawhah hian ram neitu diktakte chu LR&S Department atangin Property Card siamsak an ni ang a, hei hi a hmandanah LSC tlukpui a ni dawn a ni.

SVAMITVA hi Mizorama district hrang hrang pakua (Lawngtlai leh Siaha tel lovin) a khaw 330 ah kalpui tur niin, tun dinhmunah IEC hi khaw 251 ah neih tawh a ni a. Khaw 71 ah Drone hmanga thlalak tawh niin, khaw 10 ah map siam zawh tawh a ni. Ground verification pawh khaw 10 ah neih tawh a ni bawk a ni.

He hunah hian LR&S Department, Lunglei a surveyor te leh, Lunglei District chhunga Village Council thlan chhuah 74 aiawhte an tel a. Zawhna leh chhanna hun hlawk thlak tak hman niin, Pu H. Lalramenga, ASO in lawmthu sawiin programme a khar a ni.