Kumin inthlan ‘Mizoram Assembly Elections 2018’ lo thleng mai tur atana inbuatsaihna kal zelah Ni 10.11.2018 chawhnu khan I&PR Conference Hall Lungleiah District SVEEP Committee buatsaihin ‘EVM & VVPAT Awareness Talkshow’ neih a ni. He hunah hian political party hrang hrang leh tlawmngai pawl aiawhte leh zirlai thahnem tak an tel. 

He hun hi Pi C.Lalremruati DIPRO in a kaihruai a, Panel memberah hian Pu K Lalrohlua Returning Officer 32-Lunglei West & 33-Lunglei East, Pu James Lalnithanga, Election Officer leh Dr Peter Malsawmtluanga DLMT te an thu. 

Pu K. Lalrohlua chuan Assembly Election 2018 hmachhawn turin inpuahchahna chak taka kalpui mek a nih thu sawiin Lunglei District-a Polling Station 185 ah te EVM leh VVPAT hman a nih tur thu a sawi a. Inthlanna hmanrua EVM leh VVPAT chu mipuiten an lo hmelhriat hmasak leh a rintlak ngei a ni tih anlo finfiah hmasak a pawimawh tih sawiin vote thlak china (Mock Poll) ah pawh a tam thei ang berin vote thlak chin turin mipuite a sawm a.Electronic Voting Machine siamchhuah a nih dan leh hman tan dante sawiin Lunglei District a Assembly bial pasarih a vote chu a ruala chhiar a ni ang, a ti.

Pu James Lalnithanga Election officer chuan Lunglei District-ah Polling Station 185 a awm thu sawiin inthlan felfai tak neih theihna turin heng Polling Station a duty tur te ngawrh taka training neihpui mek zel an nih thu a tarlang a. Inthlan lo awm turah Assembly bial pakhatah hmeichhia vek duty na Polling Station – Pink Polling Station pakhat zel a awm dawn a, inthlan buaipuitu zawng zawng leh Police duty thlengin hmeichhia vek an ni ang, a ti. Polling Station thenkhat chu Vote thlak tan atanga a tawp thlengin Live a tihchhuah a ni dawn a, YouTube lamah en theih tura buatsaih a ni, a ti a. Service Voter ten awlsam zawka vote an thlak ve ngei theihna tura Electronically Transmitted Postal Ballot System ruahman a ni, a ti. Lunglei Districtah pianphunga rualban lo vote thlak thei tur mi 401 an awm a, hengte hian awlsam zawka vote an thlak ve ngei theihna turin ruahmanna siam a ni dawn a ni, a ti bawk. 

Disitrict Level Master Trainer Dr. Peter Malsawmtluanga chuan EVM leh VVPAt chungchang zirtirna pein heng khawlte hi kalkhawmte hmaah hna a thawh dan leh vote tlate tih chingpen theih a nih loh dante a hrilhfiah. 

He hun hman hi Video a cover vek niin mipui tam zawkin EVM leh VVPAT anlo hmelhriat theihna turin Lunglei District a Cable TV-ah te tihchhuah leh a ni ang.