3771/2024-2025

Lunglei, 2025 Pawlkut thla ni 13: Vawiin khan Lunglei District Bawrhsap Pi Navneet Mann hovin DC Conference Hall, Lungleiah Swachh Bharat Mission-Grameen (SBM-G) leh NAMASTE scheme chungchangah ṭhut khawm buatsaih a ni a. PHED, UD&PA, DLAO, DEO, Social Welfare leh I&PR Department ai awhte an tel.

Pi Navneet Mann chuan faina leh thianghlimna kawng leh tui thianghlim hnianghnar leh inthiarna ṭha chungchanga khawtlanga hma sawnna a awm theih nana Swachh Bharat Mission (SBM) kal tlanga hma lakna ṭha a tih thu sawiin, hmasawnna chhenfakawm zawk a awm theih nan thawh hona ṭha a awm zel a beisei thu a sawi.

PHED Lungleia SBM (G) District Coordinator Pi F. Lalrindiki chuan report pein, Lunglei District-a khaw 99-ah kum 2024-ah ODF Plus hma lakna kalpui a nih thu leh khaw 98-ah 100%  hlawhtlinpui a nih thu te, Khawmawi khua bikah 95% thawh tawh a nih thu leh January 2025 chhunga zawh hman tum a nih thu a sawi a. ODF Plus hnuaiah hian bawlhlawh mumal taka khawn ṭhin a nih thu te, Swachh Bharat Mission kal tlanga bawlhhlawh paihna hmun siamah paih ṭhin a nih thu te, Individual Household Latrine (IHHL) hnuaia khaw 21-ah inthiarna 300 siam zawh a nih thu te, SBM (G) pualin zirna inah campaign buatsaih te, social media-a tar lan leh sponsorship kalpui ṭhin a nih thu te a sawi.

He ṭhut khawmah hian NAMASTE scheme chungchang sawi ho a ni bawk a. NAMASTE scheme hi scheme thar niin, khawtlang mipuite faina leh thianghlimna atana thawktu (sanitation worker)-te himna leh zahawmna vaen him a nih theih nana hma lakna a ni a. NAMASTE scheme hnuaiah hian Lunglei District-a bawlhlawh khawntute an lo hrisel zawk nan leh an him zawk nan hmanraw ṭha - uniform, glove, mask leh thil ṭul dangte ngaihtuah ni se, tih a ni.