2296/2024-2025

2024 Mimkut thla ni 30: Swachhata Hi Seva 2024 hnuaia faina beihpui thlak kalpui mekah vawiin khan Urban Development & Poverty Alleviation (UD&PA) Department Lunglei hnuaia faina lama hna thawktu (sanitation worker)-te hriselna dinhmun chu Convention Centre, Lungleiah Health & Family Welfare (H&FW) Department Lungleia thawktute'n an endiksak.

UD&PA hnuaia faina lama thawktute hi mipui vantlang hnawmhnawk leh in chhung bawlhhlawh te khawn khawm a, a thehthang leh sawngbawlna lam buaipuitu leh vantlang hmunhmate thian faitu an nih angin bawlhhlawh nena inchiahpiah renga hna thawk an ni a. Fimkhur takin hna thawk mah se, natna hrik leh bawrhsawmna hrang hrang kai awlsamna hmuna thawk an nih avangin an hriselna dinhmun ngaihven a ṭul hle a. Hei vang hian Swachhata Hi Seva 2024 kalpui chhung hian an hriselna dinhmun endik tura ruahmanna siam niin, vawiin khan H&FW Department Lunglei aṭangin doctor pahnih, nurse, pharmacist leh thawktu dangte chuan a thlawnin an hriselna dinhmun hi an endiksak a. Thisensang, zunthlum, pan/lawng (ulcer), rannung seh (scrub typhus) leh sikserh (malaria) natna an vei leh vei loh te endik niin, sakawr ek hrik (tetanus) hri danna (vaccine) pek nghal an ni bawk.

Lunglei District Urban Development Officer Pu C. Sawihlira chuan UD&PA hnuaia faina lama thawktute hriselna a thlawna endiksaktu H&FW Department Lunglei chungah lawm thu a sawi a ni.