1608/2025-2026

Lunglei, 2025 Mimkut thla ni 23: September ni 17, 2025 aṭanga October ni 2, 2025 thleng awh tur faina beihpui thlak, 'Swachhata Hi Seva' campaign kalpui mekah vawiin kha India ram pum huapa faina hnatlang thawh ni, 'Ek Din, Ek Ghanta, Ek Sath: Nationwide Voluntary Shramdhaan' atan ruahman a nih angin Lunglei District-a sawrkar pisa, zirna in leh anganwadi centre-te chuan an pisa leh zirna in hmun hma tifaiin, faina thutiam an tiam.

Lunglei District Level Committee on "Swachhata Hi Seva 2025"-in a rel angin Lunglei DC Office chuan sawrkar office hrang hrang chu ram pum huap hma lakna hi zawm a, vawiin hi pisa tihfai ni atana hmang tur leh faina thutiam tiam tura hriattirna chhuahin, he hriattirna bawhzui hian Lungleia sawrkar office hrang hrang chuan an office leh a chhehvel an tifai a. Hemi rual hian faina kawnga hma la tur te, mi dang zirtir leh tihhmuhtu ni tur te'n an intiam nghal a ni.

September ni 17 aṭanga October ni 16, 2025 inkar chhunga 8th Rashtriya Poshan Maah hman mekah, hman khat daih sarang (single use plastic) ṭhat lohzia leh bawlhhlawh thliar hran (waste segregation) pawimawhzia inzirtirna, 'Awareness on Single-Use Plastic and Waste Segregation' chu vawiin khan hman ni bawkin, DPO leh CDPO staff-te bakah, Lunglei ICDS Project chhunga anganwadi worker-te chuan faina hnatlang an thawk a. Anganwadi Centre tinah thawktute leh naupangte'n faina hnatlang leh environment humhalh hnatlang an thawk bawk.