1367/2024-2025

2024 Vawkhniahzawn thla ni 30: Vawiin khan Mizoram Youth Commission (MYC) leh Lunglei District Cooperative Union (LDCU) te buatsaihin Convention Centre, Lungleiah Symposium on Building Cooperative As Viable Economic Enterprises hun hman a ni a. MYC Chairman Pu Malsawmzuala Ralte chuan Khuallian niin a hmanpui.

Khuallian Pu Malsawmzuala Ralte chuan hlawhtling turin tum ruh leh taimak a ngai tih sawiin, Cooperative Society hmanga hlawhtling tur pawhin mi aia tum ruh leh taimak a ngai tih kan hriat a ṭul, a ti a. Mizoramah thiamna sang nei kan pun rualin hna thawh tur erawh a vang si a, chu vangin MYC pawhin India ram chhung leh ram pawnah Mizo ṭhalaite thawh ve theih tur kawng a dap mek a ni, a ti a. Japan nen disaster managemnent lam leh photography lamah thawh ho tuma ruahmanna kalpui mek a nih thu sawiin, British Army-ah Mizo ṭhalai mi 30 vel an awm mek thu leh tunah hian British Army-a ṭang duh ṭhalai 100 chuangin dilna an theh luh leh tawh thu a sawi a. MYC chuan National Skill Development Corporation, Gurgaon an dawr mek thu leh anni kal tlang hian Mizo ṭhalaite tan Japan-ah hna a thawh theih dawn tih sawiin, India rama hotel lar tak taka thawh theih nghalna tur hotel management zirna September 2024 aṭanga kalpui tum a nih thu te, Taiwan-a Chinese ṭawng zir turin Lunglei ṭhalai mi pahnih thlan an nih tawh thu leh an zir zawh hunah Mizo ṭhalaite tan ṭawng zirna buatsaih a nih tur thu leh Indigo Company hnuaia cabin crew hna atana hma lak mek a nih thu te a tar lang.

MYC Chairman chuan  sawrkar hna kan ngaisang lutuk hi a ṭha ber lo va, sawrkar hna ni lo, din chhuahna tur a tam em em a, chu lam chu ṭhalaite'n kan bawh a ngai a ni, a ti a. Chu'nga hlawhtling tur erawh chuan kan tumah kan chian a, taimakna leh teirei peihna kan neih a pawimawh ber a ni tiin, hlawhtlinna tak tak nei turin mi dangte kuta innghah lutuk ai chuan mahni kuta innghah leh mahni inhai ven a pawimawh a ni, a ti bawk. 

Symposium hi Lunglei District Cooperative Union President Pu K. Darlawma'n a kaihruai a. Khual zahawm, Cooperative Societies Additional Registrar Pu Robuanga leh khual ṭha, Mizoram Cooperative Apex Bank Chairman Pu Lalnunsanga te pawhin thu sawiin, cooperative society hmasawnna tur leh ram tana an thawh hlawkna kawng hrang hrangte an tar lang bawk.

He hunah hian resource person-te'n thupui thlan sa hrang hrang hmangin thu an sawi a. Dr Vanlalmuana, Head of Department, Commerce, Govt J. Buana College-in cooperative society-te sumdawnna ngelnghet a nih theih dan tur (Building Cooperative Societies as Viable Economic Enterprises), Dr K. Lalromawia, Asst Professor & Asst Director, UGC MMTTC, Department of Management, Mizoram University-in society-te thar chhuah hralh dan tur leh hlu zawka tihpun dan tur (Marketing Strategy & Value Addition for Cooperative Societies), Pu MC Zomuana, Member, Mizoram State Planning Board & Team Leader, Synergy Technofin, Mizoram-in ṭhalai leh cooperative-te khawtlang ngelnghet zawk siam tura thawh hona (Youths & Cooperative: Building Resilient Communities Through Collaboration), Pu Remsangpuia Hauhulh, PACS Development Cell, MCAB Ltd-in cooperative society-te leh PACS-te account vawn dan kalhmang tlangpui (Basic Account Maintenance System for Cooperative Societies & PACS) leh Pu Mirza Akik Beg, Deputy Director, NCDC-in NCDC aṭanga cooperative society-te tana ruahmanna awmte (Policies & Schemes for Cooperative Societies under NCDC) tih thupui hmang te'n zirtirna an pe a. Zawhna leh chhanna hun hman a ni bawk.