1845/2024-2025

2024 Thlazing ni 30: Vawiin khan Mizoram sawrkara Art & Culture Department leh Mizo Academy of Letters (MAL) Joint Headquarters, Lunglei ṭang dun huaihawtin A&C Auditorium, Lungleiah 'Thu leh Hlaa Lalzuithanga leh Lalsangzuali Sailo te sulhnu zir hona' (seminar) buatsaih a ni.

He hun hi Art & Culture Department Joint Director Pu Gen Khan Do chuan Khuallian niin a hmanpui a. Mizote tana Pu Lalzuithanga leh Pi Lalsangzuali Sailo te sulhnu, an thu ziah leh hla phuah te ropui a tih thu sawiin, ṭhangtharte tan entawn tur hnuhma ṭha tak hnutchhiahtu an ni, a ti a. Thu leh hla lama sulhnu ṭha nei tur chuan zirlai nih lai aṭangin thu ziah peih leh lehkhabu chhiar tam a ṭul thu sawiin, thu leh rimawi te chu ram leh hnam leh kohhran natna tidamtu a ni, a ti a. Art & Culture leh MAL te'n thawh hona ṭha tak an neih ṭhin thu leh thu leh hla lama ramin hma a sawn zel theih nan seminar te an buatsaih ṭhin thu sawiin, ziak mi, harsatna avanga lehkhabu tichhuak thei lote chu Art & Culture Department-in a ṭanpui thei reng tih a sawi bawk.

He hun hi MAL Jt Hqrs Lunglei President Pu C. Hrangdula chuan a kaihruai a. Pu Rochharzela leh Pu F. Vanlalrochana te'n Pu Lalzuithanga chanchin leh sulhnu te an sawi a; Pi Vanlalsiamthari leh Pu TC Jonunsanga te'n Pi Lalsangzuali Sailo chanchin leh sulhnu te an sawi bawk a ni.