750/2025-2026

Lunglei, 2025 Nikir thla ni 9: June ni 5 kha World Environment Day niin, he ni pual hian Lungleiah chuan Urban Development & Poverty Alleviation (UD&PA) Department bul tumin thing phunna hun leh plastic aṭanga siam hmang tlem tura inzirtirna hun hman a ni.

He hun hi Lunglei Municipal Council (LMC) Councillor Pi Malsawmkimi Khawlhring chuan hmanpuiin, lui tui leh ramngaw te nasa lehzuala humhalh a ṭul thu leh environment humhalh kawnga theih tawp chhuah tura fuihna thu a sawi a. Lunglei District Urban Development Officer (DUDO) Pi Lalhruaitluangi chuan hun kaihruaiin, kal khawmte'n Environment Day pualin thutiam an sawi rual bawk a ni. 

He hun hi Ministry of Housing and Urban Affairs (MoHUA) hnuaia AMRUT Mitra hma lakna peng pakhat atana India ram puma beihpui thlak mek, ‘Women for Trees’ (thing tan hmeichhiate) project hnuaia ruahman a ni a. A thawh khatna atan World Environment Day pual hian Ramthar Venga UD&PA Department Quarters bul ram awlah thing phun a ni a, he lai hmun bakah hian College Veng thlanmual ram chhungah te, Bazarveng thlanmual ram chhungah leh Zohnuaia tuikhur pahnih - Sihpui Tuikhur leh Tuikhurpui bulah te June ni 11, 2025 (Green Mizoram Day)-ah phun leh tura ruahman a ni.

He project hnuaia thing phun leh a enkawl zui hna hi DAY-NULM, UD&PA Department hnuaia din, Self Help Group thlan bikte'n an thawk dawn a. AMRUT Mitra hian khawpui chhunga chengte'n tui thianghlim in tur leh mamawha hman tur tui hnianghnar tak, in (house) tin thleng phak an neih theih nana hma a lakna kawngah Self Help Group member hmeichhiate tel vena remchang ṭha tak a hawnsak a. Project hrang hrang - thing phun te, public park enkawl te, water treatment plant hmunhma enkawl hna te siamsak an nih bakah, tui dah khawl leh renchem inzirtirna te neihpui ṭhin an ni. AMRUT Mitra hnuaiah hian Centenary Park, Pukpui leh Children Park, Chanmari te chei mawi leh tihhrin belh hna thawh mek a ni bawk a. He'ng hnate hi Self Help Group inzawm khawm pawl Area Level Federation te'n an thawk a ni.

World Environment Day 2025 thupuiah hian ‘Beat Plastic Pollution’ (plastic bawlhhlawh tihrem) tih a nih angin, UD&PA Department, Lunglei hma laknain AOC Bazar-ah hun hman chhunzawm a ni a. Plastic bag/polythene thlakna atan ip ṭawih ral thei (biodegradable bag) semna hun hman a ni a. Kawr leh lui dungah mipuite'n plastic bur an paih mai mai ṭhin tihremna atan ‘Plastic Back Policy’ chu June ni 5 & 6, 2025 chhung hian kalpui ni bawkin, hemi hun chhung hian UD&PA Office-ah plastic bur chhia/hlui pakhat cheng khat (₹ 1/-) zelin a thleng theih a. He'ng bur lei khawl sate hi a nihna tur ang taka sawngbawl a, ṭangkai zawka hman leh tum a ni.