3768/2022-2023

Lunglei the 6th March, 2023: Vawiin chawhnu khan Lunglei District Football Association (LDFA) buatsaih kum 15 hnuai lam te tana Football Tournament hawnna chu Pi Ramdinliani Deputy Commissioner Lunglei leh LDSC chairman ni bawk chuan a hmanpui.

Under 15 Football Tournament hawnna inkhawm tawi Pu R.Lalawmpuia Chairman, Organising Committee kaihhruaiah Deputy Commissioner Lunglei leh LDSC Chairman ni bawk Pi Ramdinliani chuan Lunglei District naupangte tana tournament hlu tak buatsaihtu LDFA chungah lawmthu sawiin he tournament-a chhuak players-te chu rilru thianghlim tak nen a inkhel theuh tur leh Lunglei mai ni lo, India ram pum huapa player tha ni thei tura theihtawp chhuah turin a chah a. Infiamna chu an puitlinna kawngah leh hriselna kawngah te an nun kaihruaia thunun tu pawimawh tak anih ngei a beisei thu sawiin ram leh khawtlang tan pawha chhawr tlak nih tum theuh turin a chah a. Naupang inkhel tura in ziak lut zawng zawngte chu mahni kum dik tak nena khel theuh tura a duh thu LDSC Chairman chuan a sawi bawk a ni .

LDFA Secretary Pu Rongaia Ralte pawhin thusawina hun neiin Organisaing Secretary Pu Joseph Lalrozama'n inhmel hriattirna leh report a pe a. Pu Lalthangfala, Former Santosh Trophy Player (Mizoram & Arunachal Pradesh) chuan player-te thutiam sawina hun (Oath Taking ) a kaihruai a ni.

LDFA buatsaih under 15 Football Tournament ah hian Lunglei khaw chhung atangin team 15 leh Lungsen atangin team 1 tel in an vaiin team 16 ten inelna an hma chhawn dawn a, he tournament hi March ni 17, 2023 thleng neih tur a ni.