1778/2026-2027

Lunglei, 2026 Thlazing ni 13: Vawiin khan Lunglei District Rural Development Office (DRDO) huaihawtin Cultural Heritage Centre, Lungleiah Viksit Bharat – Guarantee for Rozgar and Ajeevika Mission (Gramin) [VB–GRAMG] chungchang zir hona, Lunglei District Level Panch Sammelan buatsaih a ni a. Lunglei District chhunga Village Council (VC) hrang hrang ai awhte chu VB-GRAMG kalpui dan tur zirtir an ni.

He hun hi Lunglei District Bawrhsap & VB-GRAMG District Programme Coordinator (DPC) Pi Navneet Mann chuan Khuallian niin a hmanpui a. MGNREGA chu hun rei tak chhung Mizoram thingtlang khuaa mite tana eizawnna hnar pawimawh tak a nih thu sawiin, thingtlang mite tan eizawnna a siam bakah, Mizo nunphunga pawimawh tak – mahni intodelh leh khawtlang thawh hona chawi nungtu pawimawh tak a nih thu a sawi a. VB-GRAMG chu MGNREGA scheme tihchangtlunna a nih thu sawiin, MGNREGA huna ni 100 inhlawhna siam ṭhin VB-GRAMG hnuaia ni 125-a tihpun chu he ruahmannain hamṭhatna a ken tel pawimawh ber pakhat a nih thu a sawi a. VB-GRAMG chuan inhlawhna tur siam bakah vantlang tana hmasawnna ruhrel pawimawh leh tlo zawk din a ngai pawimawh hle tih sawiin, hmasawnna atana department hrang hrangte nena thawh hona ṭha neih a ngai pawimawh hle bawk tih a sawi.

Pi Navneet Mann chuan khawtlang hruaitute chu training-a an thil zirte chhawr ṭangkai thei ngei tura inbuatsaih tura chahin, khawtlang mamawh mila hna thawh dan tur ruahmanna, Viksit Gram Panchayat Plan (VGPP) ṭha tak siam tum turin a chah a. Lang tlang leh belh chian dawl taka khawtlang hmasawnna hna thawh kalpui ṭhin tur te, endikna (social audit) ngai pawimawh tur leh sum vawn dan leh chhinchhiahna (record) vawn dik ngai pawimawh tur tea chahin, Local Administration Department (LAD) aṭanga computer set an dawnte hmang ṭangkai a, digital thiamna hmanga hna thawh leh bawhzui tur hrang hrang ṭha taka hlen chhuak thei tura ṭan la turin a chah.

Lunglei DRDO Project Director & VB-GRAMG Additional DPC Pi Zoramdini chuan hun kaihruaiin, inlawmna thu a sawi a. VB-GRAMG chu July ni 1, 2026 aṭanga kalpui ṭan a nih tawh avangin VC-te'n an mawhphurhna leh tih tur an hriat chian a pawimawh thu sawiin, khawtlang mamawh leh an ṭhatpui tura ruahmanna siam thiam a pawimawh thu a sawi a. Scheme hlawhtlinna chu khawtlanga kalpui danah a innghat tih sawiin, khawtlang hmasawnna an rilruah dah lian ber a, a tam berin an hlawkpui tura ruahmanna siam ṭhin turin khawtlang hruaitute a chah.

He hunah hian Lunglei Block Development Officer Pi Grace Lalremdiki Sailo bakah, Rural Development (RD) hnuaia thawktute leh Lunglei District chhunga VC hrang hrang ai awhte an tel a. Lunglei DRDO Office-a MIS Nodal Officer Pi HK Lalrintluangi'n VB-GRAMG Act 2025 chungchang te, VLGRC/VEC mawhphurhna te, chhungkaw hrang hrang ziah luh dan tur leh Gramin Rozgar Guarantee Card pek chhuah dan tur te a sawi fiah a. Works Manager Pu Ramnunsanga'n VGPP siam dan tur te, hmasawnna ruhrel din kawnga hriat tur pawimawh te, RD programme dang nena thawh ho dan tur leh lang tlang leh rin tlaka hma lak a nih theih nana ruahmanna hrang hrang te a sawi fiah bawk a. Zawhna leh chhanna leh sawi hona hun hman niin, Assistant Rural Development Officer Pi Carolyn MS Bunghai chuan lawm thu sawiin hun a khar.