1634/2025-2026

Lunglei, 2025 Mimkut thla ni 27: Vawiin khan Mizoram sawrkara Animal Husbandry & Veterinary Department, Mizoram State Veterinary Council leh Indian Veterinary Association te ṭang ho huaihawtin Lungleia District Veterinary Hospital-ah khawvel pum huapa ui â hri dona ni, "World Rabies Day 2025" pualin hun hman a ni.

World Rabies Day (WRD) ni tak hi September ni 28 niin, kumin hian Pathianni a nih avangin vawiin khan he ni pual hian hun hman a ni a. Kumin hi WRD ṭum 19-na niin, thupuiah "Act Now: You, Me, Community" (Nang, kei, khawtlang, kan zavaia ṭang rualin ui â hri i veng ang u) tih chu hman a ni.

Lungleia WRD 2025 puala hun hman hi Lunglei District AH & Vety Officer Dr Ngurzidingi Sailo chuan a kaihruai a. AH & Vety Southern Zone-a Joint Director Dr B. Lallawmsanga chuan thu sawiin, rabies chu natna hlauhawm tak, virus chi khat 'Lyssavirus'-in a thlen a nih thu leh ran leh mihringa inkai chhawn theih (zoonotic disease) a nih thu a sawi a. Khawvel puma ram za sawmnga zetah rabies hi buaipui a nih thu te, World Health Organisation (WHO)-in a chhut dan chuan kum tin mi 59,000 aṭanga mi 70,000 vel zetin an thihpui ṭhin thu te, mihringin rabies an kaina tam zawk chu ui seh aṭangin a nih thu te a sawi a. Ui vulhtute chu an uite ṭha taka hri danna (vaccine) pe tur leh National Rabies Control Program (NRCP) tum dan anga kum 2030-ah chuan rabies vanga thihna a awm tawh loh nana hma lakpui turin a ngen.

He hunah hian ui leh zawhte eng emaw zat chu a thlawnin hri danna (vaccine) pek a ni a. Vaccine hi Lunglei Farm Venga District Veterinary Hospital-ah office hun chhungin lak theih reng a ni.

Lunglei District Veterinary Hospital-ah hian ran zaitir duh tan Thawhṭanni, Thawhlehni leh Nilainiah chawhma dar 10 aṭanga chhun dar 12 inkar chhungin hming ziakin, zaitir theih a ni.