1747/2024-2025

2024 Thlazing ni 26: Vawiin khan Lunglei District Level Committee for Celebration of Teachers' Day chu an Chairman, Lunglei District Bawrhsap Pu R. Lalṭhazuala hovin Lunglei DC Conference Hall-ah an ṭhu khawm a, September ni 5, 2024-a Lunglei District-a 'Zirtirtute Ni' (Teachers’ Day) hman dan tur an sawi ho.

Chairman Pu R. Lalṭhazuala chuan zirtirtute chu mihring puitling leh hman tlaka min chher chhuaktute an nih angin an pawimawhin, chawimawi an phu em em a, chawimawi nachang hriat a ṭul a ni tiin, an tana ni bik atana serh hran, Zirtirtute Ni-ah phei chuan uar lehzuala zirtirtute chawimawi a pawimawh thu a sawi a. Member-te chu chawimawi an phu ang ngeia zirtirtute chawimawi an nih theih nan ngaihtuahna seng turin a sawm a ni.

He hunah hian Lunglei District Education Officer Pi K. Lalrintluangi hnen aṭangin kum hmasa lama Teachers' Day hman dan report ngaihthlak a ni a. Kum dang ang bawkin kumin Teachers' Day pawh hi Lunglei District chhunga zirna in zawng zawngin anmahni remchan dan angin anmahni sikul ṭheuhvah hmang leh se, Lunglei District chhunga zirtirtu ṭha chawimawina (National Award/State Award) dawng tawhte chu an thawhna sikul ṭheuhvah hun hmanpui tura sawm leh chawimawi ni se, tih a ni a. Lunglei khawpui chhung hmun paliah Teachers' Day banner tar ni se, DEO Complex-ah national/state awardee-te chawimawina thlalak tar chhuah ni bawk se, tih a ni a. Hemi bakah hian Zirtirtute Ni puala Lunglei Bawrhsap Pu R. Lalṭhazuala thuchah chu local cable TV kal tlangin tihchhuah ni se, tih a ni bawk.

State Level Working Committee-in a lo ruahman angin kumin hian zirtirtu damlo leh harsatna tawkte ṭanpuina atana hman tur National Foundation for Teachers' Welfare (NFTW) Fund atan zirtirtute'n pawisa thawh leh ni se, tih a ni a. Nikum 2023 khan NFTW Fund atan hian zirtirtute'n ₹ 100/- zel thawhin, Lunglei District chhungah hemi atan hian ₹ 4,28,500/- hmuh a ni a. Lunglei District chhunga zirtirtu 13 chuan nikum khan NFTW Fund aṭangin damlo kanna/ṭanpuina an dawng bawk a ni.

Vawiin meeting-ah hian sawrkar official-te; zirtirtu inzawm khawm pawl hrang hrang, zirlai pawl leh tlawmngai pawl ai awhte leh zirtirtu ṭha chawimawina dawng tawhte an tel a ni.