1845/2025-2026

Lunglei, 2025 Thlazing ni 26: Vawiin khan Lunglei District Level Committee on Teachers' Day Celebration chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm a, September ni 5, 2025-a 'Zirtirtute Ni' (Teachers’ Day) lo thleng tur atana inbuatsaihna leh a lawm dan tur an sawi ho.

Lunglei District Education Officer Pu Micky R. Lalenkawla'n kum hmasa lama Teachers' Day hman dan leh kum 2025 atana ruahmannate a tar lang a. Kumina Teachers' Day hman dan tur rawtna hrang hrang sawi ho niin, Teachers' Day ni tak, September ni 5 chu sawrkar chawlh a nih avangin September ni 4 (Ningani)-ah a lawmna hrang hrang chu buatsaih ni se, tih a ni a. Lunglei District-a Teachers' Day lawmna pui ber chu District Level Committee huaihawtin September ni 4, 2025 (Ningani) chawhnu dar 1:30-ah Saikuti Hall-ah buatsaih tum a ni a. Hemi ni vek hian Teachers' Day hi Lunglei District chhunga zirna in zawng zawngin anmahni remchan dan angin anmahni sikul ṭheuhvah hmang se tih niin, sawrkar office hrang hrangte pawh an office-ah zirtirtute hlutna leh pawimawhna inhriat thartirna, "Re-affirmation in honour of teachers" hun buatsaih tura ngen ni se, tih a ni a. Lunglei khawpui chhung hmun pawimawh lai hmun ngaah Teachers' Day banner tar tum niin, sikul leh college te chu an remchan dana zirtirtute chawimawina thuziak (steet poster) tar tura ngen ni se, tih a ni bawk.

State Level Working Committee-in a lo ruahman angin kumin hian zirtirtu damlo leh harsatna tawkte ṭanpuina atana hman tur National Foundation for Teachers' Welfare (NFTW) Fund atan zirtirtu tinin ₹300 ṭheuh thawh leh ni se, tih a ni a. Zirtirtute Ni puala Lunglei Bawrhsap Pi Navneet Mann thuchah chu local cable TV leh social media kal tlanga tihchhuah turin ruahman ni se, tih a ni bawk.

Nikum 2024 khan NFTW Fund atan hian zirtirtute'n ₹200 zel thawhin, Lunglei District chhunga zirtirtu 1,933 hnen aṭangin cheng nuai 3.8 chuang (₹3,86,600) hmuh a ni a. Lunglei District chhunga zirtirtu 17 chuan nikum khan NFTW Fund aṭangin damlo kanna/ṭanpuina dawngin, hemi atan hian a vaiin cheng nuai 3.7 (₹3,70,000) sem chhuah a ni.